達達身體情況突然轉差, 完全無預警下發生於一剎那…
琴晚佢喺梳化瞓覺, 老公如常陪喺佢身邊, 到咗晩餐時間, 我叫老公叫醒達達, 我就入㕑房準備晚餐; 點知老公突然叫我, 話達達企唔到, 嚇得我慌忙跑出嚟急急同佢滴藥急救啦!
見到達達全身有啲蹦緊, 腳仔踢緊好似抽筋, 即刻同佢滴順勢療劑, 都係focus喺心肺功能, 再加埋中風同肌肉抽筋, 然後按摩佢身體, 隔咗一陣, 感覺佢再無不安嘅表情正慢慢放鬆, 我放佢入氧氣箱等佢靜靜咁瞓; 熟睡後數佢呼吸, 一分鐘12下無呼吸困難無好用力好平穩!
我當然唔敢瞓, 半夜見佢企起身, 我即刻抱佢出去尿尿, 佢都可以正常轉圈兩頭騰, 尿尿完就返氧氣箱, 整晚都可以安安靜靜咁瞓!
今早比佢食早餐, 佢好乖好快食曬, 但明顯見佢好攰無氣無力咁, 我就放返佢落氧氣箱休息陣, 一直到10點幾, 突然見佢缩起前手, 我即刻抱佢出嚟滴藥按摩, 但我個心就一直往下沉!
達達抽起前手呢個狀況, 自從用咗順勢療劑, 兩年幾來已經再無發作, 呢兩年幾佢仍然開開心心聲大大, 雖然挑食, 但氹吓手餵都肯食曬, 其實我好感恩!
 |
| 今日午餐後見佢精神唔算太差, 希望佢會好返啦 |
今日見佢舊病復發, 感覺唔多好, 太多朋友嘅狗狗一隻走咗另一隻好快都跟住走埋....
波波離開後我都有過擔心, 怕達達傷心, 今次波波離開, 係見到達達情緒變化同豆b離開時有唔同, 但我怕吸引力法則, 怕影響到佢所以唔敢再諗!
呢兩隻豬仔雖然成日有吵吵鬧鬧, 但畢竟係相伴一齊長大, 佢哋自有佢哋相處嘅模式, 唔好質疑狗狗嘅感情世界, 佢哋嘅愛比人類更純淨更寬大!
 |
| 雖然有嗌交, 但都係相親相愛, 陪伴住大家一齊長大 |
如果年紀老大器官老化, 真係華陀再世都救唔返, 我亦唔想勉強拉長佢受苦嘅時間, 明白花開花落有正常時序, 人力無辦法力挽狂瀾; 如果今次達達嘅生命天書已翻到最後一篇, 佢又好心急去陪波波的話, 我希望佢都好似波波同豆豆咁, 瞓住覺平靜咁去彩虹橋玩!
真係好可怕, 身體健康可以一吓子就跨, 琴日仲正正常常兩頭行, 突然就拋下個炸彈…
今日見佢手仔縮起嘅剎那, 好怕佢已經到咗極限....
越諗越崩潰, 我要點面對呢個變化????
 |
| 隻豬仔好啲就唔肯困箱裡面瞓 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
