 |
| 等緊睇醫生仲好精神 |
決定帶達達去見一見醫生, 都係要攞個專業評估先放心!
達達琴日明顯有好轉, 但到咗晚上又轉差, 手仔又吊返起, 好似手軟無氣力; 還好無影響到佢胃口, 唔使餵都肯食, 亦唔覺佢有痛嘅表情, 但佢時好時壞我個心就難安定, 有啲驚; 雖然睇佢嘅表現, 我有過好多唔太壞嘅猜測, 但會唔會係我太樂觀, 真係有問題就延誤咗佢個病情?
今日一早做booking, 好幸運星期六都排到即日睇症, 都真係要睇咗個心先會定!
 |
| 見完醫生死咗一半 |
晚上見到馮醫生, 詳細講晒公主嘅病徵, 真係好多謝馮醫生好細心逐寸檢測, 連每隻腳趾仔都摸勻晒, 結論係其實達達腳仔好有力😲!
檢查時無論點摸點按佢都無想縮開, 亦唔覺佢有痛嘅積像, 神經方面亦係正常反應; 關節仍在可接受嘅範圍, 醫生認為情況唔差, 叫我要淡定.
但我話達達行得無咩力, 搖搖擺擺好得人驚....
馮醫生聽我描述, 再加上佢今日嘅診症, 估計應該係佢瞓覺時壓住手臂, 血氣流通有阻滯,手痺所以縮起, 加上佢年紀唔細, 就好似老人家咁氣虛血弱, 人老都會搖搖吓, 要依賴枝拐杖卸吓力; 達達要靠自己就唔太夠氣力, 所以有啲搖擺不定, 但當我哋hold住佢時佢有咗借力, 可以發力強勁!
馮醫生係西醫, 補氣血呢啲要問中醫, 但佢有叫我幫佢照紅外線燈, 有助血液循環對佢都有益!
之後聽心肺, 肺清無事, 心率OK, 但心雜音比起兩年幾前差, 之前為3級, 依家評定為4級喇!
我唔貪心, 健康狀況穩步下調我接受, 祇要佢唔辛苦, 緩住腳步慢慢走, 乎復何求?
我真係好怕帶達達見醫生, 出門前生生猛猛, 回程謝晒, 返到屋企攰到唔食晚餐, 企都無力; 應該仲有幾日先回到氣, 望住佢瞓到咁死好肉赤, 有啲後悔帶佢出去!
 |
| 返到屋企攰得要死 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
