到今日, 波波離開我已經兩個月, 但我對乖仔嘅思念並未變淺, 反而越來越渴望可以再見佢一面, 那怕喺夢中相見!
呢個願望一直未能實現, 反而佢嘅聲音, 我彷彿聽過好幾遍.....
呢 60日, 我如常過日子, 已經少咗流眼淚, 雖然我確信可以喊出嚟係一個正常發洩!
波波, 無論你依家身在何方, 媽媽嘅愛都一直與你同在, 你喺我心裡面都一直從無離開, 但我再見唔到你喺我身邊, 亦再無可能撫摸你嘅小臉, 都係感覺有欠缺!
亦有瞬間想起你時, 會感覺極其心痛, 諗起你過去嗰3年睇唔到嘢暗無天日, 祇依賴住媽媽嘅聲音過日, 會唔會度日如年?
再重溫你健步如飛嘅video, 對比起你後來連企都企唔到, 真係好心酸, 個心就好似被一隻大手, 大力揪住來回扭曲旋轉, 嗰種痛嘅感覺好確切......
呢種痛無特定時間地點, 還好唔係密密出現, 希望隨住時間過去會越來越少!
其實媽媽好欣慰你今次選擇離開, 係一個好勇敢嘅決斷, 波波你應該有更好嘅生活, 唔應該對塵世再有留戀; 我諗你依家自由自在咁生活喺彩虹橋, 跑起上嚟一定身輕如燕, 甚至可以翱翔天際飛得快過火箭!
媽媽應該要諗好嗰方面, 唔應該戀戀不捨, 總要抱緊信念我哋一定會再見; 我當然希望你有美好嘅新生活, 可以睇到、跑到, 愛你點可以自私咁希望你留下病榻纏綿!
養咗狗狗後, 開發咗我好多新範疇, 例如以往做嘅羊毛氈, 繪畫, 黏土, 煮鮮食餐比3隻豬仔, 都曾經比咗好多時間去鑽研; 到咗今日因緣際遇, 又愛上聽歌做視頻, 雖然我做嘅全無藝術可言, 只算入門階段, 應該BB班都未算, 但聽到一啲相關嘅歌詞好有共鳴時, 都係一種好好嘅情感發洩!
我就流連喺歌曲嘅意境中來回往返, 雖然配上相片後每每會睇到眼眶發熱, 但可以釋放心裡面嘅抑壓, 都係我療傷嘅良藥, 我就恣意咁比歌曲陪伴住我, 從清晨到夜晚入眠!mp4 - 永不失聯的愛
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
