 |
| 相片連結 |
3隻豬都鍾意食龍躉魚, 尤以達達為首, 佢真係好鍾意; 達達非常嘴刁, 每次開餐都係望吓就行咗去, 好似無咩特別興趣; 每次都係豆豆、波波都食完, 佢見到並無選擇, 先死死氣去食咗佢!
其實一星期7日, 每日我都蒸唔同肉類, 無理由咁無興趣, 唯獨蒸龍躉魚, 佢會九秒九食光佢!
狗狗對食都無大興趣當然唔係好事, 達達身體咁多事, 甲狀腺低 、脫毛症、反射神經遲緩腳仔又無力, 仲要有抽筋症狀又牙仔有事攪到猛打乞嚏.....
所以見佢鍾意食呢種魚, 都想盡量滿足佢; 見佢食得咁開心好快清兜, 我仲有咩猶豫? 琴日老公就專程去旺角街市, 為咗買龍躉魚比呢隻豬, 快手分好份量過晒磅, 然係放上冰格, 因為我每星期只係比佢哋食一次!
因為呢塊魚, 引起網友關心會唔會易有重金屬, 中雪卡毒等問題, 咁又不防睇睇!
首先龍躉水銀含量並唔算超高, 一般常食嘅青衣, 桂花魚, 甚至紅衫魚都高過佢, 而吞拿魚、老鼠班比佢高出成倍添啦; 有網友愛用秋刀魚餵狗狗, 水銀都比龍躉含量為高, 所以只要唔係頻密大量咁進食, 其實都唔使太驚嘅!
聯合國糧食及農業組織/世界衞生組織聯合食物添加劑專家委員會建議, 水銀嘅暫定每週可以攝入量, 係每公斤體重唔應該多於5mcg, 以達達體重計算, 1.6kg可以每星期攝入8mcg水銀都係屬安全範圍, 而龍躉每100g含水銀為5.1mcg, 我每星期只比佢食45g魚肉, 即使含水銀量都只有2.3mcg, 距離最高安全範圍嘅8mcg仲有好遠, 所以係安全嘅!
更何況都仲唔係定期每星期都一定買比佢 ;)
至於雪卡毒呢個問題, 都要睇魚魚係咪聚居於珊瑚礁一帶; 雪卡毒素多積聚喺內臟、魚頭同魚皮, 最多咪避開呢D囉!
我哋一向都幫襯開旺角嘅伯伯, 都食咗好多次喇, A都係喺嗰度買呢種魚比狗狗, 從無出過事!
每種食物都有不同問題, 琴日話好有益要食多D, 今日又可能有新發現叫唔好食, 咁點避? 唯有飲食均衡, 每種食物都唔過量攝取就可以!
呢張圖表有好多不同魚類含水銀量, 喺下面條link大家可以瞭解多D!
http://eastweek.my-magazine.me/index.php?aid=3381
後記:
蒸好魚比3隻豬, 加上椰子油炒蛋同雜菜, 佢哋食得好滋味 :)
 |
| 仲有紅菜頭粉葛紅蘿蔔粟米豬展湯, yummy yummy! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
