 |
| 相片連結 |
每日同3隻豬仔清潔梳毛, 要用好多時間; 尤其係達達, 用magic mist噴濕毛毛後, 仲要按摩一大餐, 等皮毛吸收吓神奇水嘅精華, 再要用暖風吹乾, 最怕凍親感冒就死喇!
達達好麻煩㗎, 做一陣就要走路啦, 一捉佢返嚟會大聲尖叫, 好得人怕, 唔熟識佢性格真係嚇死啦!
達達最叻係用尖叫去宣洩不滿, 性格真係刁蠻:(
3隻豬仔當中波波算最合作, 仲可以清潔埋棚牙, 不過任我點努力幫佢, 佢仍然好快就有牙石, 我諗呢樣同個體質都有關!
見佢咁快又有牙石, 望到好唔安樂㗎, 有時佢會用手去撥個面仔, 都係有唔舒服啦; 但我再唔敢帶佢比獸醫洗牙, 都係見步行步好喇, 反正獸醫都唔建議麻醉, 未到生命攸關嘅抉擇, 我都盡量避免比佢哋做麻醉, 一切只好按兵不動喇!
豆b就成隻馬騮仔咁啦, 總係典嚟典去, 喺我身上爬上爬下, 又怕整親佢條頸, 真係買佢怕!
凈係同佢哋做日常清潔都好忙喇, 仲要做物理治療啦, 再加上要做埋家頭細務, 真係要有三頭六臂先得喇!
忙就要諗吓辦法, 睇睇點可以騰出時間, 突然記起場效應治療波波達達都可以一齊做, 咁照紅外線都可以試吓嘛!
不過得出嘅結論係除非嗰日真係無時間, 都係分開做較好, 兩隻一齊做焦點集中較難!
雖然係忙透, 但照顧3隻豬從一開始我都唔假手於人, 從前養狗係咩都唔識, 當然輕鬆自在, 只係得閒時就逗逗狗狗, 餵飽飼料就以為算係一個稱職嘅主人; 咁多年落嚟, 經歷越多, 越體會養狗係一門非常高深嘅學問; 從食用, 到運動, 生理心理上嘅照顧, 遇上佢哋有病時嗰種擔心煎熬, 真係難用筆墨形容!
佢哋係活生生嘅生命, 同樣有思想感覺, 同佢哋相處越耐, 感情牽絆越深, 就會常常自問, 要點做先可以令佢哋一生過得快活開心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
