豆b用咗新配方嘅homeopathic bioscan remedies有一星期喇, 咁短時間當然唔會見到好明顯嘅效果, 我明白對治療慢性病係唔可以心急; 從豆b開始無胃口, 到確診肝腎失衡, 都有4個多月喇, 中間有過高低起跌嘅關口, 但用咗順勢療法後, 雖然見唔到有好具體嘅進步, 但每日總算過得平穩, 佢情況無越嚟越壞, 都尚算精神!
豆b胃口改變晒, 對生果蔬菜類甚致以前最愛嘅蕃薯, 完全拒絕接受; 之前為咗個腎病, 減少咗比肉類, 佢精神差晒, 體重由1.62kg >1.57kg>1.49kg一直下降, 見到咁真係好擔心, 再係咁就算保得住個腎唔再差落去, 都保唔到命喇, 一眾朋友都叫我比佢食返多D肉啦!
自從將尺度放鬆番, 加肉加蛋白, 豆b體重慢慢咁回升返, 今日有1.597kg, 算唔錯喇!
開始見返以前嘅為食豆喇, 會呱呱叫開餐!
video: 催開餐
我明知咁放縱對控制蛋白尿係相反, 但都要利用蛋白質去修復個肝嘛, 既然兩者都互相矛盾, 咁我不如比豆b食得開開心心啦!
今晚, 又比豆b飲羊奶, 老公望住豆b, 突然同我講, 叫我盡量比豆b食佢鍾意嘅嘢啦, 豆b底子咁差, 點做都唔會好長命㗎喇....
一聽佢咁講, 我有一剎那失神, 好似無咗靈魂; 我唔會好天真咁去諗豆b會好返, 我只想可以做好D爭取多D相聚嘅時間, 將個病惡化程度慢慢拖長嘛, 但當我咁努力嘅時候, 都唔使咁坦白將我打沉啦😭
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
