琴晚阿女煮咗好好味嘅母親節晚餐, 估唔到佢廚藝進步咗咁多, 整到D帶子好彈牙, 我食咗唔少 :)
老公就買咗4隻急凍龍蝦, 呢款龍蝦雖然size唔大, 但鮮甜無比, 我encore過好多次; 急凍嘅好處係唔需要太多事前工序, 我哋廚藝未精, 怕放尿呢環做得唔好就無得食添;) 因為想食原味, 清蒸就算!
預咗我哋每人一隻, 剩餘一隻當然係比3隻豬仔share啦; 都無研究咩磷鈣比例, 又是否高蛋白喇, 老公同阿女齊聲咁話, 佢哋肯食, 就比佢哋食啦; 除咗龍蝦, 每個食材都蒸少少比佢哋食吓, 連芒果蛋糕都食埋, 節制得太耐人都癲, 唔理咁多乜都食少少, 豁出去喇!
當然波波同達達一定鍾意啦, 豆b我就唔敢講喇, 而且佢又嘔過, 都唔知有無胃口嘛; 但意料之外, 豆b食咗一啖後, 兩隻眼仔發晒光, 係咁撲撲撲, 胃口開晒, :)
已經好耐無咁開心, 一家大細笑哈哈, 見到3隻豬嘅表現我太滿足喇!
其實我好矛盾, 見豆b想食當然開心啦, 但又怕佢食完會再嘔嘛, 好難好難先將豆b養返肥少少, 一嘔輕凸晒 :'(
無驚無險咁過咗一晚, 佢無再嘔喇, 達達都OK無再硬晒呔, 不過我唔會咁天真認為已經無事, 可能上天比我喺母親節鬆一鬆, have a happy mother's day 啦!
今日又要多謝兩位好朋友, Ka仍為豆b做金字塔治療, 佢謙稱自己係初學, 叫我唔好介意佢功夫未到家, 其實佢呢份心意我太太太感謝喇; Ka約略講過我知個大概....."金字塔結構內部形成嘅一種場能可以震蕩人體嘅分泌腺, 內分泌腺受到刺激, 產生最大嘅分泌功效, 經由佢哋製造嘅激素, 加強身體各部分嘅功能, 恢復健康."
所有嘅另類療法都好奧妙, 大家有興趣可以睇吓呢篇介紹!
Link :用金字塔能量重啟生命
再要多謝Am嘅禮物, 真係唔講得笑, 我從來都無留意原來有咁細嘅匙羹仔, 其實用藥想準確真係有必要; 嗰日同Am傾起用藥嘅份量, 偶然閒聊, 就講起佢有從美國訂購不銹鋼量匙, 去到1 drop咁細真係好少見; 佢知道豆b依家有D藥粉要用量匙, 就即日用速遞運嚟比我 , 二話不說!
叫咗佢運費到付嘛, 佢就係都要運費都比埋錢 :p
感恩每個時段都出現好幫我嘅朋友, 相遇嘅緣份得來不易, 但願友誼長存!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
