今早一打開FB, 就睇到個壞消息, V仔突發心臟衰竭, 去咗做小天使喇; V仔係我認識嘅狗狗, 唔止見過一次, 當然比只係網上認識, 而從未見過面嘅更親切啦!
睇到呢個不幸嘅消息, 好難過, 個心好似有塊大石壓於無形....
生命要流逝, 就算拼上老命都係捉唔住, 就如海上嘅一抹浪花, 曾經湧起, 瞬間回復平靜; 只係摯愛嘅親人, 面對呢個如驚濤駭浪嘅經歷, 傷痛好難撫平!
V仔, 一路好走, 步向光明!
豆b胃口好飄忽, 早前都肯自己食凈肉, 近來又再時食時唔食; 已經唔再計算蛋白質, 只要佢肯食, 就先照顧佢胃口, 無奈到最後, 都要出動針筒強泵入佢口, 好勞累, 滿滿挫敗感!
 |
| 以為佢會食, 但攪咗一輪, 原封不動 :( |
琴日用試紙再幫佢驗尿蛋白, 仍然無improvement, 可能源頭未明確就診, 下星期見Dr Fan再問問, 有無可能用溫和嘅檢測去搵出原因, 入侵性嘅test就免問喇!
 |
| 照針灸筆反晒肚, 衰豬仔好享受! |
情況似漸差, 胃口、大小便都唔平穩, 毛質變薄變差, 健康嘅指標每況愈下....
我嘅感覺有如身患重病嘅人, 先係唔接受, 再來唔甘心, 然後矛盾於死心繼而接受命運!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
