今朝一早又幫豆b照燈, 今日覺得佢唔係好精神, 有D擔心!
琴日豆b又無胃口, 早午晚3餐都要氹 , 因為有軟便, 又唔敢餵羊奶, 真係頭痕; 好彩今早算回復正常胃口, 早餐食雞雞好快清晒!
今日喺FB見到有毛孩家長留言, "養寵物唔會嫌棄累, 只係害怕失去嘅痛, 只要佢哋健健康康就心滿意足"!
我諗大部份視毛孩如兒女嘅都有同感, 而呢個感覺, 近期嘛, 我更認同!
我再忙再攰都無問題, 但求豆b比我多D時間, 我唔介意佢日日扭計日日煩!
自從發覺豆b有病, 我真係忙到無晒自己嘅時間, 每分每秒都好似有嘢要攪; 餵藥又頻繁, 好彩我唔使返工, 要返工嘅點可能做得到呀!
仲有每日餵食3餐, 唔順利佔大多數時間, 幸運嘅手餵都肯食, 無胃口時點做都無功而返, 仲要每日為餐單諗到頭都爆!
我唔係一個鍾意煮食嘅人, 但為咗3隻豬, 已經做咗好多不可能; 今次為咗豆b, 仲死死氣去學做餅, 甚麼分蛋法, 好麻煩; 鍾意做糕點嘅人一定唔覺得難, 但我真係無興趣嘛, 仲要每次嘗試做唔同口味, 心機成擔; 但都係吃力不討好, 佢最多食兩餐 :(
我每日都要同自己做輔導, 叫自己要接受佢係唔會好, 見佢情況轉差都要接受到, 呢個係實情我點會唔知道?
早兩日佢開胃精神又重返, 我甚至天真咁以為佢有轉好, 今日見佢精神又差又唔肯食, 就不由自主咁好懊惱!
照顧一隻毛寶貝, 而佢係有不能逆轉嘅病患, 每次嘅感覺都係一樣, 心情高低起伏好辛苦!
生老病死呢個課題真係好深奧, 當中載住有幾多沉重嘅背負😢
 |
| 去街街都唔開心 :( |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
