今日係母親節, 比3隻豬攪到我咩都唔記得晒, 不過阿女好有心, 話今晚親手焗大蝦, 今晚為我煮母親節大餐, 知我要睇住D豬仔唔想出外喇; 老公又話會買龍蝦, 慰勞吓我呢個身心疲累嘅媽媽, 有摯愛家人嘅關愛, 總算好幸福啦!
都祝大家美滿幸福, 母親節快樂啊!
呢排真係煩, 講親都係D豬仔嘅病情, 真係攞膽, 不過都要接受呢3隻BB豬續漸老大, 器官慢慢退化!
琴日達達突然又硬晒呔, 縮起一隻後腳好似全身僵硬, 我抱起佢幫佢按摩, 又好快鬆返晒.
不過到傍晚又縮起前手, 我覺得有古怪, 即使老公話咁唔似抽筋, 但我覺得應該係抽筋初期嘅徵召, 都係餵一次順勢抽筋療劑好喇, 唔想真係見到佢抽到典晒, 到時我實嚇壞 :(
好彩一整晚都無再病發, 我真係提心吊膽, 又唔敢影響呢隻豬嘅情緒, 佢一向細膽, 都只敢用眼尾睄睄!
除咗波波嘅能量鏈墜比達達戴, 希望幫到佢啦, 波波就戴返磁性頸帶, 我唔捨得再買喇; 如果唔係唔敢除豆b嗰個, 我真係想就咁3隻豬輪住戴 ;)
嗰頭覺得豆b有好轉, 精神唔壞, 去街街都會笑晒, 就安樂D啦, 點知琴日佢嘔喇; 我知道腎病狗會嘔, 都配備胃酸藥, 但豆b無呢個問題, 我無比佢食啦; 點知無例外, 要嚟嘅終於都要嚟, 琴日係豆b確診後第一次嘔, 今日都嘔咗一次, 咁係咪病情進一步壞?
其實我係唔應該妄想佢會越嚟越好, 係我太貪心喇, 但願盡能力照顧, 佢往後嘅日子唔會太辛苦啦!
朋友Ka去學咗金字塔能量治療, 佢話會幫豆b做吓, 不過叫我唔好期望咁大, 話自己都係試試咋; 我當然明白凡事都無保証啦, 咁耐以來我都用盡方法幫隻豬, 但效果如何? 佢情況都係好搖擺, 時好時壞!
但朋友呢份心意我接收晒, 好多謝佢幫豆b, 希望豆b乖乖合作, 有所得著啦!
豆b用咗好多另類療法, 我都係唔想對佢身體傷害更大, 順勢療師有提醒過西藥對肝腎傷害都大, 況且獸醫都話無咩藥可以扭轉局勢喇; 另類療法係我僅有嘅希望, 但願佢未來嘅日子過得舒服D啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
