 |
| 相片連結 |
近11月尾, 就快踏入12月, 天氣漸漸凍喇; 琴日同2隻豬仔整理佢哋嘅衣櫃, 將夏天衫收起換上冬天衫, 見到每一件豆b嘅衫, 仍然情緒波動, 感情氾濫; 逐一撫摸豆b嘅衫仔, 假想摸住佢小小嘅身軀, 好難忍得住眼淚, 唔怪得有睹物思人呢一句!
未可以若無其事㑆㑆而談小豬豆, 只可以將佢放入心底避免觸動傷口痛處!
 |
| 以後再無需要買同款嘅衫喇 :'( |
豆b今次離開同我上咗一課, 亦令我改變咗好多, 毛小孩係我哋嘅老師真係無錯!
我感覺自己對半杯水嘅theory領悟多咗, 開始唔再去諗只剩半杯水, 而會感恩仲有半杯握在手裡!
今次帶波波身體檢查, 其實不如理想, 仍然有高蛋白尿, 但我會感恩情況唔係太壞, 仲有幫助嘅空間; 亦明白年紀大總會身體某D機能老化變差, 唔係呢個病又會有其他啦, 只要佢生活正常無辛苦, 喺我能力範圍盡做就好喇!
我會小心握住呢半杯水, 但求唔會太快蒸發!
 |
| 見到佢哋開開心心就滿足喇! |
經過咗8個月緊逼嘅生活節奏, 隨住小豬豆離開, 生活回復常規運行; 波波有時會唔肯食, 要我坐喺佢旁邊一路話佢乖, 希望佢係扭計, 唔係身體有問題啦; 達達就食得好快, 但脾氣好壞, 呢D都係情緒問題, 做成呢個情況應該唔係單一原因, 年紀漸大身體分泌有變化等等啦!
但我無不耐煩, 再無以前覺得佢哋多多麻煩, 可以為佢哋做到嘅每一樣, 一點一滴我都要好好緊握, 我好珍惜同佢哋共處嘅每個時間!
天氣凍血氣運行會變差, 就做多D保養啦, 然後同佢哋出去行吓, 呼吸唔一樣嘅空氣, 享受唔一樣嘅空間, 即使只落一落樓下, 行一轉都唔壞 🙂
出過去佢哋明顯會瞓得好咗, 刺激過大腦會攰嘛!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
