對豆b嘅思念並無隨住時間過去而丟淡, 尤其諗起佢通過Ka傳話, 對我講'多謝媽媽咁錫佢', 每次諗起佢講呢句我都一定落涙, 一個識珍惜、識感恩嘅小朋友, 叫人點可以唔鍚佢?
仍然好掛住好掛住呢個女, 好怕有一日, 我會忘記咗我哋共處嘅過去!
時間係治療師, 會慢慢將傷痛減去, 但都會一併將珍貴嘅記憶淡化減褪; 想當日同心愛嘅叻叻話別我亦心痛落涙, 個心列開如碎片下墜, 無咗心愛嘅叻叻點生活落去?
但到今日再諗起叻叻, 嗰種椎心之痛的確已經過去, 回想同佢一齊生活嘅片段只覺唏噓, 心痛嘅感覺變得朦朧, 越諗越覺得自己走咗入個夢𥚃, 既真實、亦模糊⋯
一個一個心愛嘅毛小孩離去, 痛過喊過隨住時日過去, 慢慢將傷痛放於內心一角凝聚; 時間大神用迷糊記憶法去幫我哋將傷痛減退, 是否做得對?
我明白沉醉於哀傷係唔對, 但我唔想將寶貴嘅記憶片段失去, 但隨住時日過去, 好多過去....真係變成過去!
雲淡風輕咁靜靜從腦海中逸去😢!
今日, 豆b仍好鮮明咁活喺我腦中, 佢一舉一動仍瀝瀝在目, 我要好好珍惜呢一種咁特別嘅共聚; 有一日, 我知道呢種深刻都會如煙淡去…
時間係治療傷痛嘅良藥? 但要將你寶貴嘅記憶作交換, 亦不容你商討, 你要付出最高昂嘅藥費!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
