 |
| 相片連結 |
先補祝大家情人節快樂, 情人節當日我要做大project, 週身唔得閒, 同兩隻豬沖涼修毛, 做完都好晏, 無精神寫blog喇, 早D瞓覺!
琴日出咗街, 同從加返港嘅姐姐飲茶, 人家咁遠返嚟, 我都只係抽到一日時間見面, 真係唔啱; 但呢排實在好忙, 今個下午又要帶波波見老師, 再做治療喇!
似乎每隔一段日子我都會搵D新嘢攪吓😌, 今次係訂咗地氈鋪房間, 以前都會鋪活動地墊, 但接駁唔到走廊入房嗰幾步, 扇門縫卡住嘛; 就係幾步距離, 對達達都挑戰好大, 每次到走廊盡頭佢都會鼓起勇氣暴衝過關, 好多時都會跣腳撻親, 好可怕; 我留意到就會抱起佢跨過地磚嗰幾步, 但無可能分分秒秒睇到, 都要諗辦法喇!
最後決定滿鋪地氈啦, 反正依家用steamer清潔地下, 每日高溫消毒唔怕會邋遢, 而且依家佢哋唔會再通地亂尿尿喇, 打理都簡單; 不過呢個達達都係無用豬, 地下唔同咗又唔敢行, 要多練習!
用咗地氈就又多咗個考慮, 唔可以再用圍欄床啦, 以前地磚都可以推得郁, 地磚滑嘛, 但改咗用地氈就唔推得啦, 最後決定買張BB網床比佢哋瞓覺; 兩隻豬已經過咗最好動嘅時間, 唔會再亂咁抓個網, 咁都好辦; 如果用手抓, 應該好快報銷喇!
買張網床都要好多考慮, 我選擇好麻煩, 見好多都係前後密封, 得兩面用網通風, 咁我就唔啱; 其實咁設計係比較耐用, 但我就一定要四面無遮掩, 事關呢個達達公主望唔到出面會呱呱嘈嘛, 所以唔多款式可以揀!
還好我選呢張床真係幾好, 我極滿意喇!
上咗網床達達又好習慣喎, 好快瞓著覺, 反而到波波, 有D緊張適應有D困難, 唯有日間都比佢哋落去玩吓, 等佢哋快D習慣!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
