今晚, 晚飯時間, 突然見到有飛蟲, 我第一時間彈起嚟; 最驚係蚊, 無用心絲虫藥, 最怕就係蚊呢種物體!
兩隻豬年紀唔細, 身體又多問題, 必要食嘅藥物已經唔少, 唔想再為預防添加藥物到身體, 去加重肝腎負擔咁無謂, 可以精簡嘅我已經盡量精簡, 必要嘅治療藥物就無辦法唔餵啦; 居家防蚊我用光觸媒燈, 夜晚兩隻豬瞓覺會加蚊帳, 雖然我好少見屋企有蚊, 但都盡量小心, 事關知道狗狗中心絲虫真係會攞命, 治療嘅用藥都好傷身體!
一見到有蟲飛入嚟, 老公即開大個窗, 想趕隻"蚊"飛出去!
隻飛蟲通屋飛, 都見唔清楚係邊類, 直到佢停咗落嚟, 阿女話唔係蚊呀, 係飛蛾仔!
即刻叫老公關窗, 唔好嚇佢唔好驅趕佢!
已經好多次見網友在FB上分享過, 毛孩走後幻變飛蛾返嚟....
我從來無諗呢D, 從無呢種聯想力, 但今晚呢個諗法好強烈, 我驚佢會係豆b, 唔想趕走佢!
阿女話呢隻飛蛾好活躍啊, 飛來飛去咁奇怪!
一般以往我見嘅飛蛾, 都係貼牆靜止狀態, 但呢隻飛蛾仔, 通屋飛勻晒, 仲每個地方停留一陣, 仲停留喺老公件衫!
真係好似豆b嘅八妹仔性格, 會唔會係豆b用另一形態返嚟??!!
近日真係好掛住呢隻豬, 係咪佢感應到媽媽嘅心思, 所以返嚟?
遲吓會請Ka幫忙, 去同彩虹橋上嘅小豆b聯繫, 睇佢有咩想同媽媽講, 我都好想知佢近況; 只要知佢活得開心快樂, 我就安慰!
 |
| video |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
