 |
| 相片連結 |
波波有脊骨內彎, 尤其條頸骨彎得頗緊要, 老師拎住佢嘅x-ray講解, 邊到有骨刺, 再拎埋狗狗嘅立體構圖解釋比我知; 一般正常骨骼係點樣生長, 而波波又係點變異!
老實老師嘅講解比醫生詳細, 波波之前照x-ray我祇知佢有骨刺, 其他乜都唔知, 今次有立體狗狗骨骼圖做對比, 好容易見到個分別喺邊處.
老師話頸椎彎曲係好嚴重嘅事, 除咗影響佢會痛, 亦影響佢週邊神經線, 當然都會影響到佢情緒變異, 認為呢方面要著重處理.
波波琴日已經有進步, 比第一次做治療時放鬆, 雖然呢隻緊張豬難免都係緊張, 但都算可以handle; 老師話要開始幫佢脊骨復位, 要慢慢一節節咁做, 唔可能一子下做好, 要做得密集D; 定咗一星期做兩次治療, 密D做, 快D好; 波波要叻仔要爭氣, 要精精神神咁企好😁!
能量治療真係好奇妙, 自己無親身接觸係好難信服, Ka話佢自己已經可以將佢寶貝嘅一粒脂肪瘤仔醫好, 當然功力唔及老師咁好, 但用多D時間都做得到嘛; 好替Ka開心, 恭喜佢向成功邁進一大步, 祝福佢越做越好!
當然唔信嘅仍然會係唔信, 事實咁玄妙嘅事真係好難諗得通, 一般唔信嘅會諗係詐騙呃錢, 我都相信會有呢種騙徒, 自己無料扮有料到, 將一件好事變壞事做!
當你嘗試深入探討, 就會感嘆世界有極大能量, 有橋樑係可以幫忙去運用; 有懷疑唔係唔好, 但亦要有開明態度, 去瞭解求証; 我自己嘛, 只要係非入侵性治療, 做嘅期間個仔唔辛苦, 我會比機會嘗試去做, 唔試又點會好?!
老師幫波波做正骨, 比能量佢內臟, 呢D治療我全部係用肉眼睇唔到, 但有一樣係無得假嘅事實, 就係波波嘅眼淚超澎湃, 見過佢嘅都會知道!
琴日老師都見到呢個仔一泡眼淚, 老師就同佢做, 我同阿女睇住波波嘅眼淚自己吸收返晒, 真係超奇怪!
一路到今日, 波波嘅眼仔都仲好好, 無淚眼汪汪係好明顯見到👍!!
老師有講過呢D唔會last好耐, 應該幾日又有返, 要時時做先好; 不過我知自己無呢種能耐, 應該學唔到喇, 期望阿女有呢種領悟力, 可以學得到😌!
下個月阿女會去上課, 好期待.....
https://www.quantumtouch.com/en/about-quantum-touch
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
