 |
| 相片連結 |
天氣又濕又翳, 但總算無落雨, 可以帶兩隻豬出去逛逛！
又到咗牛蜱活躍嘅季節, 每次帶佢哋出外都有D驚, 尤其放過佢哋落地跑, 就會更緊張, 中招真係無命; 依家出去唯一保護就衹有噴天然草本作預防, 已經再無用任何口服藥, 就算係天然草藥, 或者順勢療劑, 任何會加重佢哋肝腎負擔都唔想, 實在已經用緊太多必須嘅醫療補充品做保養!
琴日同兩隻豬出去, 衹打算比佢哋坐手推車上, 地下又濕又滑, 剛沖完涼無耐唔想毛毛咁快遭殃; 其實佢哋有得去街街, 坐喺車上已經好滿足咁東張西望, 就算我係擔心牛蜱, 都唔想剝削咗佢哋嘅歡樂時光; 每次準備外出時, 佢哋見到架車仔已經好緊張, 我會盡量盡量, 滿足佢哋咁卑微嘅願望!
呢架滿載回憶嘅手推車, 應該係最後一次上場, 聽日新車送達, 我就要送佢去堆田區放😢 !
叫工人姐姐推住架車仔比我最後影返張全相, 個心真係好不捨好感傷, 咁當然唔捨得嘅係不能割捨嘅美好回憶, 唔係架車😉!
 |
| 上星期嘅雞肉骨湯 |
今日兩隻豬要留守屋企, 事關今日要做佢哋嘅骨肉濃湯, 上星期試用兩隻全雞做bone broth, 味道係好香, 但膠原就好勉強, 祇做到一個稀jelly狀, 今次都係用返雞脚, 但加上牛尾, 應該更濃香, 希望兩隻豬仔會欣賞😋!
 |
| 今日用牛尾加雞腳 |
留喺屋企當然要做保養, 天氣潮濕會誘發好多毛病, 林醫生都透過whatsapp提醒, 潮濕天氣會令毛孩感到不適, 尤其係身體孱弱, 會出現疲倦、經常透大氣、喘氣等情況, 亦會令皮膚同關節情況變差, 要量保持室內乾爽!
今朝一早用場效應治療儀同兩隻豬仔熱敷, 隔個晚上阿女負責靈氣傳送, 算係內外兼顧; 做得嘅就盡量做, 唔再加添太大壓力比自己, 但求做到對佢哋零虧負!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
