咁快就過咗蜜月期, 湊住呢兩隻豬, 有個喘息機會已經係恩賜; 不過唔好呻, 呢個好少事, 呢種天氣呼吸道有事並唔奇!
琴日達達早餐時, 已經感覺佢食得唔太順意, 一餐半餐我由得佢, 叫自己放鬆D; 到咗午餐都明顯無食慾, 我開始擔心究竟係乜事, 傍晚飲湯仲死, 一放低個碗佢行咗去, 叫佢都唔肯過嚟, 唯有用針筒餵佢!
我一向餵食都好小心, 用最細針筒, 少量入口比足時間佢哋回氣; 好怕佢哋會逐親, 萬一不幸嚟過吸入性肺炎就死; 呢個issue我時有聽聞一直好留意, 逐親入肺部誘發肺炎會致死, 對小型犬唔係奇事!
講就好似好誇張, 但事實週邊朋友狗狗有咁遭遇, 都聽過幾次, 所以我係好小心, 好留意點餵佢哋!
琴晚餵達達飲湯, 佢一吞就逐親真係嚇死, 還幸我衹打入極少量, 佢衹係咳咗一陣, 不過我已經知佢一定係有事, 會係喉嚨定鼻仔出事?!
無見佢有明顯病徵, 除咗有D眼仔濕濕, 探熱體温正常, 無打乞嗤無重呼吸, 唯有再觀察留心住!
晚餐食得更差要手餵, 好彩仲肯呑, 但究竟係乜事呢?
上個月先同佢做咗body check, 驗血無大件事, 唔通又好似豆b咁不幸, 驗血都驗唔出邊度出事? 真係擔心死!
阿女近日同佢做reiki時, 已經話佢比波波需要更多能量, 感覺不停咁拉扯住; 但阿女功力未深又唔知邊度出事, 只覺頭同尾差D, 做某個部位會打乞嗤, 係反映咗佢某個地方有事; 除咗比佢多D能量, 佢話唔識點幫佢喇, 叫我留意多D, 小心睇住; 咁佢呢幾日又無異常, 我真係唔知從何處開始喎!
即使佢琴日一整日都無胃口唔太精神, 但大小便正常無痾嘔, 亦係正常體溫, 我真係唔知係乜嘢原因, 一直到琴晚全家都瞓喇, 到深夜就比佢嚇到我彈起身!
半夜瞓到朦朦朧朧, 聽到佢抓床, 我即刻跳起身, 見到佢用個口仔呼吸😱!!!
抱起佢感覺到佢有鼻塞, 即刻放佢去聞氧氣, 再立刻凖備個霧化機; 一路比佢吸氣, 就見佢鼻仔噴咗少少鼻涕出嚟, 還好係正常顔色, 唔係黃綠色發炎黏液!
唔怪得全日食得唔好, 應該係鼻塞聞唔到無食慾, 飲湯會逐親應該係鼻塞換唔到氣, 有咗病徵咁打理都叫做有頭緒!
如果我警覺高D, 早知係傷風感冒, 我可以早D用順勢療劑幫佢嘛😞!
天氣唔好溫差濕度轉變大, 可能佢都唔舒服咗幾日喇, 我又大意唔察覺啦; 呢幾日除咗reiki時間, 佢連乞嗤都無打過嘛!
琴晚聞完氣, 即刻餵佢順勢藥, 再加草本療劑, 之後見佢可以熟睡, 咁都好D!
今朝自己肯食早餐, 我就再比佢聞氣加上順勢療劑, 再用微能量針灸筆跟足穴位幫佢, 今晚叫阿女集中呼吸系統做reiki!
明顯感覺佢有好轉, 精神返D!
靈氣治療係唔可以替代醫療, 有病仍要倚仗藥物幫助, 但就可以發揮一定效果, 再加上其他輔助, 希望個豬女可以康復快D啦!
 |
| 做住reiki已經好咗好多, 精神咗😃 |
 |
| 霧化加氧氣 |
 |
| 針對感冒嘅穴位跟足照射住 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
