 |
| 相片連結 |
天氣潮潮濕濕, 開始回暖萬物復甦, 達達毛毛嘅休眠期又平安過渡, 今年都可以keep到無甩毛; 今日同佢梳毛feel到有彈性開始變好, 肚仔毛毛雪白光亮, 頸背嘅黑毛都慢慢減退, 雖然唔可以叫做好, 但見到有正面改變已經好滿足!
毛髮變好係一個指標, 佢心情都會較好!
波波心情都好好, 阿女話佢變返開心寶寶, 明顯心情無咁煩燥, 琴日仲可以同貓貓近距離接觸, 無吠爆仲有少少互動😊!
可能唔使密密見醫生我自己有放鬆, 直接反射落佢度, 亦可能食咗幾日中藥, 佢身體較舒服; 雖然目前都唔可能做到血檢, 但唔再太著意一個指數喇, 祇要佢食得到瞓得好, 開開心心就好!
今日帶兩隻豬出去散步, A話氣壓唔好潮濕唔舒服, 不過天氣預告下週又會降 10度, 咁我都係今日同佢哋出吓去好; 最多唔比佢地落地行, 怕咗又影響到波波嘅皮膚; 兩隻豬仔坐住車仔行一round, 明顯心情好!
無留心原來係放學時間, 都未見有學生, 但波波已經扎晒馬開始吠神情警戒, 完全忘記咗佢係睇唔到, 推住架車仔飛快走開唔停步, 快快遠離學校範圍; 然後靜落嚟, 好開心見到以前嘅波波復活😌 , 以前好怕佢嘈生晒, 失而復得嘅感覺, 未試過真係領略唔到有幾好😉!
今日仍然按保養劑量餵波波中藥, 波波無唔舒服, 開始有信心今次係行啱路!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
