特別好瞓D (w/album)

相片連結

持續同3隻豬出去行吓, 比佢哋開心跑跑, 雖然喺屋企佢哋都會跑來跑去, 但出過外面感覺佢地特別好瞓D; 天氣再凍就好難keep得住,  除咗怕豆b頂唔住, 自己都一定會偷懶, 諗諗開住暖爐窩住張被, 都想像到唔願出去行 ;)

體重管理

每兩個星期都會幫3隻豬仔磅體重, 一般都上落唔大, 咁多年都算keep得幾好; 依家已經唔興狗瘦主人羞嗰套, 我哋要狗狗健健康康,  要體重控制得好!

浸死海浴鹽 (w/album, video)

相片連結

前晚達達好曳曳, 我剛瞓著就比佢嘈到又要彈起嚟, 依家佢要尿尿都會通知, 唔會屙落床仔; 真係好唔想起身, 但又唔可以唔理佢, 唔想佢瀨濕晒D被仔 :(
死死氣爬起身抱佢出去, 佢真係要尿尿, 其實佢係好乖, 唔會亂嚟; 以為幫比佢去咗尿尿就可以好好瞓番覺 :) 屙完抱番佢落床仔, 點知呢隻刁蠻女承勢曳曳, 係咁吖吖叫, 真係比佢激到暈低!
呢條短片就見到達達成日都係咁扭計!

超級狗癡 (w/album)

相片連結

琴日3隻豬浸milky spa, 無時間去街!
達達做先鋒, 我多數同佢先做, 買呢個milky spa主要都係因為佢甩毛毛; 其實佢甩毛並唔多, 但佢毛囊會有休止期,  無論我點做都好似避唔到, 但願浸微泡真係對佢有幫助, 可以提升佢新陳代謝, 等快D生番毛毛!

順勢狗 (w/album)

相片連結

睇到好多狗狗喺呢種天氣都有椎間盤復發問題,  就好似人有風濕咁, 潮濕天氣特別多呢種case, 所以近排我都對3隻豬特別留意!
果然達達又開始脚震, 前幾日豆b又有古怪行動, 行吓又坐低, 我心諗....佢哋個病真係又番嚟?

好耐無出街行 (w/album)

相片連結

今日又同3隻豬仔出去, 都係搵番件衫比佢哋著住, 因為樓下超大風, 話之波波唔鍾意; 好怕冷親佢氣管又咳咳, 又怕咗兩個女猛咁打乞嚏!
不過今次揀咗件衫較大size, 咁波波唔覺箍住, 就會好D!

No morning sun lasts a whole day (w/album)

相片連結

星期日無出街, 3隻豬好乖自己去瞓覺, 我就做吓手功啦, 預備用嚟過聖誕 :) 
我做嘢好怕咁狼忙, 好怕掛一漏萬, 出問題時想要補救又無時間; 雖然要做嘅唔係咩大計劃, 但要做就唔想做出D垃圾!
其實咁嘅性格同依家個時代好唔協調, 呢D好似屬史前文化,  哈哈 ;)

免麻醉洗牙

達達又甩咗隻大牙, 佢嘅牙仔咁差, 甩牙我全無意外㗎; 由帶佢番嚟 , 到去絕育時請獸醫做埋洗牙, 就知佢牙仔無得攪; 本身牙質都係差, 可能細個吸收營養有問題卦!

我有嘗試同佢刷牙, 其實最始初佢係肯比我做㗎, 刷牙剪指甲都好乖, 但絕育後就性格變晒, 咩都唔合作仲驚到呱呱叫, 有情緒病啊; 依家唔好講刷牙, 要掂吓個嘴仔都唔得啦!

落雨去街 (w/album)

相片連結

琴日一早起身見天色唔好, 黑沈沈好似夜晚, 仲有落雨, 咁3隻豬仔無得去街喇, 就留喺屋企玩啦!
可能呢幾日都有出去, 到咗差不多時間, 3隻豬嘅表現好似等開䬸, 兩頭騰來騰去, 走去放車仔嘅房間, 又走嚟我面前轉圈呀!

同佢哋講落雨唔出去喇, 自己玩啦, 3隻豬似懂非懂, 行開去爬低瞓覺, 個樣就悶悶不樂啦; 只有達達心情比較好, 呢隻豬女真抵讚 :)

希望3隻豬爭氣 (w/album)

相片連結

天氣明顯涼咗, 琴晚瞓覺要同佢哋著衫, 今晚就唔使喇!
要好好捉緊呢D日子, 唔冷唔熱嘅天氣好短暫, 要同佢哋去多D街!
咁好嘅天氣豆b行都唔會喘氣, 又唔使擔心中暑, 唔出去好徙 :) 不過樓下風好大, 所以出去要同佢哋著番件薄衫!

氣味相投 (w/album)

相片連結

寫咗呢個blog不覺已經有3年幾, 今日望見總瀏覽量竟有達到十萬人次, 當中應該會有係無意中clicked咗入嚟, 但阿Q嘅我就話知你啦, counted咗入嚟嘅數字就照計, 比自己對號入座開心D, 哈哈!

其實呢D係數字遊戲, 仲要係蚊型數目無得同人哋比, 但知道有人會睇吓又幾開心㗎, 當然最開心係大家關心呢3隻豬啦 :)
估唔到大家會有興趣睇我嘅狗狗日記, 亦有朋友話有參考我嘅日常湯水, 同3隻豬嘅私房料理, 呢個真係意外嘅驚喜 :)   
不過自從3隻豬轉咗食homemade, 我都好少整呢類菜式喇,  全都簡單清蒸, 只係特定節日先會玩吓其他花式 ;)