 |
| 相片連結 |
星期日無出街, 3隻豬好乖自己去瞓覺, 我就做吓手功啦, 預備用嚟過聖誕 :)
我做嘢好怕咁狼忙, 好怕掛一漏萬, 出問題時想要補救又無時間; 雖然要做嘅唔係咩大計劃, 但要做就唔想做出D垃圾!
其實咁嘅性格同依家個時代好唔協調, 呢D好似屬史前文化, 哈哈 ;)
今日要同3隻豬出去行吓喇, 天氣好好, 我最鍾意呢種太陽光, 溫暖又唔熱, 即使大風吹住都唔凍嘛!
唔著住衫嘅波波好生猛, 自己兩頭跑, 達達心情好靚, 但我覺得今日佢行得較差, 有輕微脚震震呀; 豆b仲令我擔心, 成日坐低唔願行!
最怕見呢D異常嘅舉動, 尤其呢兩日睇到FB好多人提及, 天氣變化令狗狗椎間盤問題復發, 我已經好擔心!
番屋企先比佢哋足夠休息, 跟住再做艾炙, 之後再照燈; 3隻豬好合作, 坐同爬低, 照頸照腰姿勢有唔同; 然後計劃用順勢療法去做保養, 拎D藥出嚟比兩個女食用!
順勢藥嘅好處係可以靈活變通, 用作治療同保養只係服用劑量次數有唔同, 達達停服都好一段日子喇, 都要再開始服用; 最近訂咗隻順勢藥話可以幫助肌肉放鬆, 主要想比豆b試用, 上次食西藥我懷疑引起脂肪瘤, 非必要我唔想比佢再用喇; 喺未去到好嚴重時先幫佢哋缓解, 希望有用啦!
No morning sun lasts a whole day, 又要努力加油, 加多D氣力去比佢哋特別照顧!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
