 |
| 相片連結 |
今日又同3隻豬仔出去, 都係搵番件衫比佢哋著住, 因為樓下超大風, 話之波波唔鍾意; 好怕冷親佢氣管又咳咳, 又怕咗兩個女猛咁打乞嚏!
不過今次揀咗件衫較大size, 咁波波唔覺箍住, 就會好D!
達達同豆b都開始食番順勢藥保養, 豆b明顯好咗D, 喺屋企見佢會兩頭走, 好似無晒事; 達達就都係有脚震, 呢個女喺任何方面都係慢熱D, 飲湯比對twins慢一拍, 出去玩warm up 嘅時間都要耐D!
達達雖要更多時間準備, 咁我幫佢做嘅保養功夫要再勤力D!
今日推咗架車仔出街, 好耐無喺外面行喇, 無諗住比3隻豬落地, 只係純做個測試, 睇吓佢哋對外界接受有無好番D; 可惜3隻豬都明顯緊張, 波波碌大對眼, 達達表情又繃緊晒, 豆b又伸長條脷喘氣 :(
尤其見到有隻狗狗喺旁邊行, 波波吠到癲晒!
算喇算喇, 番入屋苑玩一陣間啦!
放3隻豬落地行, 今日豆b唔同晒, 無再成日坐低喇; 達達初時表現麻麻, 遊樂場呢邊唔熟識卦, 唔敢行, 企定定只郁個頭同對眼; 都係行番去老地方啦, 雖然風大, 但3隻豬仔放鬆晒, 由得佢哋行咗一陣間, 已經夠鐘食晚餐!
休息後幫3隻豬仔艾炙, 達達再做埋場效應啦; 達達真係好乖, 拎個鴨鴨枕頭放佢前面, 佢就識點做喇!
咁乖嘅小朋友應該要比佢快D好番啦, 達達要加油啊!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
