 |
| 相片連結 |
達達做先鋒, 我多數同佢先做, 買呢個milky spa主要都係因為佢甩毛毛; 其實佢甩毛並唔多, 但佢毛囊會有休止期, 無論我點做都好似避唔到, 但願浸微泡真係對佢有幫助, 可以提升佢新陳代謝, 等快D生番毛毛!
達達浸浴一向都唔肯坐低, 4隻腳仔踏到實, 一定要我用手去扶; 但琴日意外地合作, 好乖咁坐低咗浸浴!
本來我應該好開心, 但我呢個人就係庸人自擾, 諗嘢總係相反方向 :(
我會覺得達達係腳仔唔好喇, 佢無力用4隻腳仔企高, 但水應該有浮力幫助, 又無理由咁差卦?
而且佢係一落水就坐低, 都無嘗試去企高; 應該係天氣涼咗, 要全身浸入暖水先舒服!
第二位輪到豆b, 呢隻豬仔梗係馬騮仔托世, 我預咗佢又會爬高爬低; 每次沖涼我都有相同諗法, 好唔好將佢帶出去美容店比人做!
但我自己都會做到唔耐煩, 真係會好抆呀, 之前D姐姐上門剪毛, 都唔用洗手盆隔離嘅雲石枱, 要將佢放喺廁板上, 等佢怕跌唔敢郁!
呢隻豬咁唔合作, 如果我將佢交托比美容店, 實比人打爆眼啦!
一諗到可能會比人虐待, 就心痛死啦, 唯有死死氣繼續!
琴日係咩好日子? 豆b令我好意外啊, 從來唔肯坐低嘅豬仔, 竟然會合作乖乖坐下!
雖然佢後來都係要爬上爬落, 但都叫肯浸咗三份二時間, 我已經係超開心啦!
第三位係波波豬, 呢個仔浸浴一向合作, 乖到無嘢好講喇 :)
沖乾淨涼要比佢哋歎吓, 天氣涼咗, 終於可以出動之前買落嘅靚靚珊瑚絨氈仔啦; 呢款有我心愛嘅松松圖案, 而且質地鬆軟, 摸落好舒服啊!
波波最鍾意瞓喺氈仔上, 見佢窩喺上面超舒服嘅樣, 我就會心情好靚, 真係超級狗癡, 哈哈!
屋企仲有一個狗癡, 就係老公喇, 每逢D豬仔唔聽話, 佢都一定幫住晒, 猛話由得佢哋嘛; 琴日老公放工時, 買咗法國鵪鶉同有機小米返嚟, 原來早前我提及有狗友煲鵪鶉小米粥比狗狗, 佢有記住㗎, 佢話天氣涼咗, 叫我煲比佢哋食啦!
好啦聽日就煲鵪鶉小米粥, 希望佢地鍾意食啦!
