達達又甩咗隻大牙, 佢嘅牙仔咁差, 甩牙我全無意外㗎; 由帶佢番嚟 , 到去絕育時請獸醫做埋洗牙, 就知佢牙仔無得攪; 本身牙質都係差, 可能細個吸收營養有問題卦!
我有嘗試同佢刷牙, 其實最始初佢係肯比我做㗎, 刷牙剪指甲都好乖, 但絕育後就性格變晒, 咩都唔合作仲驚到呱呱叫, 有情緒病啊; 依家唔好講刷牙, 要掂吓個嘴仔都唔得啦!
絕育完嘅初期見佢真係好慘, 一向佢伸手就嚇到尿都賴, 我有懷疑過到底佢絕育時麻醉藥份量有無不足, 會唔會醫生見佢細身唔敢用咁重藥, 咁達達仲有知覺, 會好痛呀??
當然呢D純係我猜想, 無憑無證啦!
講番牙仔問題, 我有過打算帶佢比醫生麻醉再做洗牙, 但考慮好多因素下, 仍唔敢做麻醉啊; 一直都擔心牙菌入心入腦嘅問題, 但更擔心麻醉後醒唔番!
我呢3隻豬要麻醉連醫生都怕怕, 每當我提及要洗牙, 醫生都顧左右而言他, 就知佢唔想擔咁高風險啦; 上次波波洗牙, 插喉後咳到死死吓, 醫生都打咗幾次電話問情況有無變差, 真係好得人怕, 以後我唔敢再做喇!
豆b就唔使諗麻醉啦, 前後見過3個醫生都話高危, 非到性命猶關一定唔博喇; 達達腰椎問題都要考慮, 麻醉後移動稍有偏差, 都危險㗎!
再問醫生佢哋牙仔真係差, 咁要洗牙嘛; 佢都搖頭嘆氣, 老實答麻醉高風險啊, 如果唔做會做成更高危險, 就一定要博啦, 反之就唔好攪喇!
好啦咁就頭痛醫頭腳痛醫腳啦, 未去到咁差唔博喇, 因為洗牙而失去佢哋我會發癲㗎!
近排有朋友狗狗離世, 我有懷疑係因為麻醉洗牙出事, 但佢咁傷心我唔敢問佢啊, 挑起佢傷口好殘忍嘛; 但憑佢講嘢嘅字裏行間, 我嘅猜測係有根據㗎!
成日都講咗題外話 :p
上次達達甩過隻牙, 當時我咩都無做就攪到頭都大, 佢後來食嘢有困難, 想食又食唔到呀 :'(
好彩我有順勢藥, 雖然唔係全針對牙患, 但都幫助到清除細菌啦; 有咗上次嘅經驗就即訂咗牙齦炎嘅藥, 有晒止痛消炎咁就定好多喇; 我唔係怕佢無牙, 醫生都有講如果有爛牙就剝咗好過喇, 係驚D細菌會去其他器官引起大問題嘛; 醫生話無咗牙仔仲有牙骨, 只要食物唔太硬, 其實影響唔太大, 起碼唔會引起大病嘛; 消化係靠胃液, 所以今次佢再甩咗隻爛牙, 我開心㗎!
即刻用順勢療法, 今次有備無患, 保住達達無細菌感染無痛啦, 幾日來情況良好, 佢食嘢正常, 無好似上次咁慘喇!
當然可以有良好習慣, 可以從細刷牙係最好啦, 但其實刷牙都唔可以保住無牙石, 同人一樣, 我哋都有刷牙, 咪都有牙石要搵牙醫洗牙; 只係狗狗洗牙要麻醉就驚啦, 有風險嘛!
最近好多狗友都有搵洗牙師, 無麻醉下上門同狗狗洗牙, 其實真係好吸引呀; 不過聽落又有D驚, 當洗牙師見到狗狗有爛牙, 佢會徒手拔除, 無麻醉架; 見post上FB嘅相, D牙仔好似黐住D肉, 痛死啦, 我頂唔順呀!
 |
| 上門清牙石剝牙, 好吸引都好驚呀！ |
我3隻豬無可能用到呢個服務, 應該係佢哋媽媽.....我, 承受唔到驚驚啊, 一怕佢哋掙扎下整傷椎間盤變癱, 二怕強行捉住佢哋會受驚嚇, 令個腦出現錯誤信息, 引發神經系統自我攻打, 出現腦炎咁就死啦!
上網睇過相關資料, 又驚做呢種去除牙石服務, 只係見到表面牙仔乾淨, 而原本有嘅問題又唔知幫唔幫到, 我呢個媽媽多多憂慮, 咩都驚一餐, 呢個無麻醉下同狗狗洗牙, 唔啱我喇 ;)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
免麻醉洗牙資料：
http://wellpets.com/anesthesia-free-vet-dentistry/
譯本:http://translate.google.com.hk/translate?hl=zh-Hant-HK&langpair=en|zh-Hant&u=http://wellpets.com/anesthesia-free-vet-dentistry/&ei=os9dVIg41oH0BZTkgIgE
