.JPG) |
| 相片連結 |
睇到好多狗狗喺呢種天氣都有椎間盤復發問題, 就好似人有風濕咁, 潮濕天氣特別多呢種case, 所以近排我都對3隻豬特別留意!
果然達達又開始脚震, 前幾日豆b又有古怪行動, 行吓又坐低, 我心諗....佢哋個病真係又番嚟?
達達已經停用順勢治療有一段時間, 物理治療有keep住定期幫佢做, 但當然無以前咁密集啦, 今次佢又開始腳震, 我又要勤力番; 針對佢嘅情況, 上次用咗幾種順勢藥, 每隻藥要隔開半小時, 一日要食幾次; 然後再做多D物理治療, 我又開始週身唔得閒!
點忙都無問題, 最重要呢種種治療夾到佢, 千萬唔好惡化就得喇!
今日同3隻豬落去玩, 明顯見到達達表情唔同咗, 無乜笑容, 坐車仔都成日爬下; 狗狗同小朋友一樣, 有咩唔妥就直接表達, 唔會講大話, 一望就知佢唔舒服, 係無花無假!
比佢行咗好短時間, 佢係行得比以前差, 仲成日停住唔行!
豆b就無問題喇, 比佢食咗3日順勢藥情況有改善就停服啦, 都係主力做多D物理治療, 唔使食藥當然係最好嘛!
今日遇到個好乖嘅小朋友, 佢同媽媽一齊落去玩, 問可唔可以摸吓佢哋; 因為豆B頸椎曾受傷, 我怕整傷佢㗎, 但見小朋友唔係嗰D曳仔仔, 好輕柔動作好慢, 我就請媽媽稍等, 先抱開波波達達!
跟住集中保護豆b, 教個小朋友輕輕摸吓, 但個小朋友都有D驚, 唔敢摸啦 :)
狗狗好叻㗎, 會知道小朋友感受, feel到係無惡意嘅; 豆b好乖, 佢主動鍚鍚小朋友!
小朋友媽媽好開心, 影咗好多相, 豆b又成功做咗公關!
今日同Mi通電話, 佢笑話睇我個blog, 日日都差唔多提住順勢療法, 話比佢導我中咗毒啦 :)
講真一開始半信半疑係人之常情, 又唔識呢D係乜東東, 香港又唔普及, 藥又點敢亂比3隻豬食吖; 如果唔係達達嘅椎間盤問題, 食咗西藥同針灸都幫助唔大, 又驚繼續落去更惡化, 我都唔敢博啦, 我真係好怕要開刀手術, 太大創傷喇!
都要多謝Mi不斷鼓勵, 叫我唔使怕, 比好多實例支持佢嘅講法, 最令我安心係佢嘅狗狗一直都係用順勢療法, 幾年來都無睇醫生, 佢話佢狗狗係順勢狗嚟, 哈哈哈!
多謝Mi咁耐心講解, 其實去說服人用藥好大擔帶, 食得好就當然功德無量, 萬一唔夾, 咁點算啊? 唔怕人家怨死你啊!
講真佢又無得益, 純係為我嘅豬仔著想, 因為自己嘅狗狗食得好, 就想幫3隻豬啦; 當日佢真係苦口婆心, 講咗好多次㗎!
Mi介紹呢間順勢藥廠, 用佢嘅藥都唔算亂打亂撞, 有需要可以將病情問順勢醫生請佢比意見, 好似遙距診症咁啦; 順勢藥安全在食錯配方都無大害處, 只係幫唔到對症要再嘗試用其他藥, 咁我就放心D啦!
講真一開始我真係超緊張, 依家就用得好relaxed喇!
我寫呢個blog, 有公開去講我用嘅藥同方法, 都係想大家嘅狗狗有近似事例多個參考; 但一定要聲明, 我用嘅方法用嘅補充品, 只係分享我嘅經驗, 我確實有試過, 但對你嘅狗狗有無幫助, 或有不良影響, 真係無得預計㗎!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
