吉祥物 - 梅蘭鶴喜

就快過農歷年, 仲有兩星期多, 兩隻豬仔嘅本命年即將過去, 呢一年算係少驚無險, 有貴人護庇, 身體狀況都算係OK; 快踏入豬年,又要睇睇對兩隻豬仔有無相冲, 有需要時就要搵件吉祥物化解咗D煞氣; 我自己從來無做呢一套, 但為咗兩隻豬仔, 做開嘅就繼續做, 就當我八卦, 算我老土到痺😜!

大家都開心

琴晚阿女同我講, 菲律賓女歌手Lea Salonga​ 農曆年間會喺尖沙咀文化中心開concert, 佢係一個國際知名嘅百老匯女歌手, 亦係第一個可以上到broadway嘅亞洲人, 上次佢來港表演阿女有去睇, 今次都會同朋友去睇正式場, 但特別在今次會做2場回饋同鄉, 超難得!

因為佢係菲律賓人, 特別減票價做兩場比賓賓, 祇係 $200一張門票, 阿女話工人姐姐咁鍾意唱歌跳舞, 叫我問工人要唔要去聽, 係一個難得嘅機會, 咁平門票場租都唔夠比, 真係做慈善咁做, 如果姐姐有興趣, 佢買兩張門票比佢同朋友結伴去欣賞啦!

一手包辦 (w/album)

要佢食菜發晒老脾黑口黑面嘅臭達達
相片連結

達達好麻煩, 越嚟越討厭食菜, 可能唔鍾意加上supplement嘅味道啦, 以前無咁刁嘴, 加乜都食晒, 依家要佢食就好難, 一見我拎住佢碟菜就鬧, 都未食就將個面收埋😖, 還好食肉時仲係食得好快; 咁都好難搞啦, 少咗纖維管理佢排出poo poo就比較難, 都要諗仲有咩辦法🤔!

家中一份子

相片連結

波波腳仔有事都幾個月喇, 情況時好時壞, 有時行得好好, 有時又趷吓趷吓, 唔通年紀大咗, 復原真係咁困難? 還是根本無機會復原, 衹可以接受現狀喇?

補償唔到

多謝A報料, 靚靚松松月曆終於收到, 要代購都等咗好耐, 不過, 我已經習慣等待, 再無以前咁心急好似鑲咗彈弓!

仲有阿女送比我嘅3豬 cushion, 從設計、揀選嘅字句都好窩心, 多謝佢送禮物會從呢個方向去著墨, 知道我收到呢種禮物最開心, 個女咁有我心, 我真幸運!

新年之始

2019年過咗3日喇, 對我來講呢個新年都麻煩多多, 首先自己出現肩周炎, 真係苦不堪言, 痛症係好大折磨; 但阿女去咗台灣又未返港, 都要死頂去照顧貓貓, 基本生活照顧唔少得啊!
自己點都可以頂住, 最慘係大除夕夜波波有唔妥, 見到佢行唔安坐唔落仲嚶嚶叫, 就知死火, 呢個仔已經唔係第一次大時大節出事囉; 幸好我好快搵到源頭, 又有順勢療劑幫助, 今次亦幸運click中咗, 好快舒緩狀況, 唔使新年初要跑急症啊!
到今日自己同乖仔情況都算已缓和, 阿女亦已回港, 我可以多D時間休息, 先有心情寫吓blog!

靚女有優惠

等咗幾日, 終於今日帶達達見眼科, 要求波波一齊覆診, 本來波波一早係約咗幾日後見醫生, 可以相就到的話, 就唔使我再去多次, 聽日阿女又出門, 我又要去照顧貓貓真係忙到暈!

假期後診所超多人, 我同老公全程都企出門口, 怕咗波波吠狗又吠人; 其實波波已經好少吠, 但佢感覺到要見醫生, 總係有不安要鬧吓人!

聖誕快樂2018 (w/album)

相片連結

平安夜, 波波、達達祝大家平平安安, 聖誕快樂!
阿女無啦啦買咗幾個聖誕擺飾比我, 我自己又訂做咗個 3豬吊飾, 順理成章同兩隻豬仔影番幾張相, 依家無興趣做大project, 但亦唔抗拒叫佢哋坐埋去影幾張嘅!

食補、藥補

相片連結

呢排要忙住照顧貓貓, 見到波波腳仔無力, 行得唔好都無辦法,  無密集做物理治療, 實在時間有限; 但基本嘅照燈, 場效應, 針灸筆加埋按摩都做足晒; 不過無見到明顯改善, 見佢跛吓跛吓咁行, 個心揦住痛啦!

要做得更好

呢幾日達達好醒目, 明顯見到佢有進步😁👍!
好感恩上天比我留意到藻心沛, 一隻咁好嘅補充品, 更感恩達達身體可以接受!

當然唔可以話加入咗呢隻產品達達成績驕人, 都只係見到佢有improvement, 其中因素亦未必只因呢隻產品, 亦要配合埋順勢療劑同其他補健品, 但可以唔用西藥, 而見到情況有改善, 我已經好開心!

青春常駐

又老咗一歲😜!
好感恩兩隻豬仔仍陪伴喺我身邊, 以前生日都無刻意同佢哋影合照, 近幾年就提醒自己要同佢哋影相留念; 有佢哋陪伴係最好嘅生日禮物, 好可惜豆b已經缺席咗有三年, 以前同佢一齊影嘅合照又好少😣!
祝自己生日快樂身體健康, 吹臘燭許願, 但願往後嘅生日, 兩隻寶貝仍可相伴我好多年, 大家都身體康健🙏!