節衷辦法

 
就嚟到中秋節喇, 天氣都仲係咁熱, 日間陽光仍然好猛, 依家多數晚上先出去行; 但又要限住時間, 一到8點就好多狗狗出動, 可能過咗晚飯時間!
其實我好怕夜嗎嗎出去行, 依家6,7點天都黑晒 :(

我好擔心D小昆虫會跳上佢哋身上,  呢D小昆虫都鍾意夜間出動嘛；雖然日光日白都唔一定避得到 , 但夜晚出動機率就一定增加, 我真係好怕惹到牛蜱呀！ 
朋友近日出街都喺狗狗身上發現幾次, 雖然我做咗準備, 有噴防虫噴霧, 但都係怕怕啦, 牛蜱唔講得笑嘛！

每次去完街, 抹身抹手脚再加風機協助, 吹開D毛毛咁會check得清楚D啦； 日間出街我check完就ok, 夜晚出去就check一次都唔放心喇, 總係坐坐吓都神經緊張彈起身, 同佢哋再check多次, 我真係好驚睇漏眼啊 :(
不過夜間出動都唔頻繁, 工人姐姐好多時都配合唔到, 佢做嘢手勢好慢, 咁就無得出街行, 最多坐車仔落樓下行一round! 

咁情況我就會喺屋企做電兔引佢哋跑, 叫做運動吓啦, 最慶幸嘅係咁樣一齊跟我跑, 對twins又唔會打交喎 :)
最好笑係達達, 佢又唔敢離開張地氈跟住我跑, 但又蠢蠢欲動喎, 佢自己一個喺張地氈兩頭跑, 對住我哋呱呱叫啦 :)
 
好彩佢哋係迷你狗狗, 咁樣都算有D運動, 就算唔出去行亦都會比佢坐住車仔落樓下遊吓花園, 唔係整日困喺屋內喇;  呢個係節衷辦法, 總之時間OK就出街行, 配合唔啱就只落平台唔出街, 我唔想自己同波波見到其他狗狗壓力咁大！


多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！