 |
今日係對twins嘅正日生日, 祝願3隻豬日日都開開心心!
每年、其實係每日我有同一個願望, 就係希望佢哋身體健康喇, 今年仲要詳細D講呢個願望, 身體健康係包括精神同肉身, 但願佢哋身體無大毛病之餘, 情緒都安穩, 更願兩姐弟今後相處融洽, 唔好一唔開心又打交啦, 呢個難題都困擾我好一段時間喇!
還好嘅係佢哋唔會每個時刻都敵對, 如果唔係就要阻隔於圍欄; 通常佢哋打交都係因為"爭", 於派零食時間, 於開餐時候, 呢個我都較易掌握喇, 但對於爭寵真係比較難!
每次抱起波波, 豆b都會跟住我, 波波覺得受威脅就會發難, 還好係波波被抱起, 所以佢只可咆哮, 唔可以打到交; 但更多時候係兩隻豬跟住我行, 好似鬥快, 佢哋爭先對望就會打交, 而呢樣控制就難攪!
波波係好唔甘心同豆b分享, 但佢唔會咁樣對達達, 不過有可能達達根夲唔會去爭, 達達性格自我, 抱起佢呢, 佢可以靜靜坐喺你身邊, 唔抱佢咩, 佢自己上床仔瞓覺 :)
而豆b就每樣嘢都一定要參與, 例如同波波梳毛咁簡單, 豆b就會排隊等候, 下一個一定要輪到佢喇, 每一樣嘢佢都要有份, 我又唔可以話佢係爭嘅; 但呢個動作都會令波波不安, 見豆b等住好似虎視耽耽, 佢就會發難!
最大問題都係爭媽媽, 波波唔要分享媽媽嘅愛, 但豆b就會爭取, 佢覺得點解我排隊都唔啱? 都係達達好, 唔會爭, 又唔會打交 :)
