 |
| 聞完氣舒服晒 :) |
又打風, 天氣差又翳焗, 唔敢同3隻豬出去喇!
近來發覺波波氣管差咗, 可能依家年紀漸長, 又可能天氣都有影響, 近數月都見佢成日有"卡卡"咁嘅聲; 雖然每次我有用香薰治療, 喺佢週圍噴上香薰噴霧, 再比佢聞氣, 都好快緩和落嚟, 但都要諗個辦法強化佢氣管健康!
年前因背痛Dr. H幫佢照X-Ray時, 仲順帶睇到佢氣管好粗壯, 以為唔使擔心佢呢樣.....
松松公認係氣管弱, 都有好多松友同我傾過呢個問題, 但老實講如果係先天結構嘅問題, 其實都好難去幫; 要做嘅都只有盡量去舒緩等佢哋感覺舒暢, 仲有利用食補等佢哋氣管較強壯!
我自己嘅做法就係比佢哋聞吓蒸氣, 等佢哋喉管無咁乾, 如果有黏液黐住佢哋氣管, 令佢哋覺得痕癢, 佢哋就會"卡卡"聲咁想咳咗D痰出嚟.
呢個做法其實都幾work, 有松友反映話幫助好大, 而最好嘅係完全無用藥, 只係令到氣管濕潤, 稀釋咗D黏液唔會令佢哋喉嚨痕癢; 不過選呢種噴霧氣都最好去賣醫療用品嘅地方, 因為一般空氣噴霧噴出嘅蒸氣好強, 但其實個粒子太大未必進入到氣管嘅!
再者就用食補方法, 一直都有每星期用淮山杞子燉鱷魚肉湯比佢哋飲, 依家唯有每星期飲多一次鱷魚肉湯, 一次青燉只配紅蘿蔔, 另一次就淮山杞子再加多樣虫草花落去, 睇睇效果有無好D啦!
3隻豬裏面只有達達氣管無怪異嘅聲, 不過都係要保養喇!
希望盡量用食補去幫, 我唔想吓吓都要食藥!
 |
| 喺佢哋週圍噴上AromaDog Cough Drop, 佢哋瞓得好舒服喇 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
