健康無價

老公斷斷續續感冒咗足一個月, 終於痊癒, 但就輪到我, 今次又係咳到飛起, 相信再落去就如之前一樣, 失聲兼無氣; 呢個好似係我病嘅模式, 每次都係少少事起, 跟住就要閉咀一段日子, 一定聲帶有事; 我發覺每次被傳染都係當上手痊癒嘅時間, 總係咁接住落嚟 :(

小小一個感冒都令人咁唔舒服, 好似個氣球漏咗氣, 如果有重病係幾咁難受, 都可想而知; 最近接觸有幾個cancer嘅case, 有人有狗狗, 想佢哋感覺一定更難受, 希望藥物可以幫到佢哋, 一切都有轉機!

上次Mi比波波試嘅安定情緖順勢藥物, 我一連5日都有餵佢, 但都有如花藥一樣, 對佢毫無意義, 波波好似有個金鐘罩保護自己, 所有外來物都反射出去, 睇黎我都別無他法, 佢都係要靠佢自己幫自己!




 

達達仲有幾日就會暫停順勢療法, 之後會用艾炙, 場效應同紅外線治療幫佢, 希望佢椎間盤病患會病情穩定; 至於毛毛就越嚟越薄, 希望好快過渡呢個脫毛期; 呢段期間唔只係影響佢嘅外觀, 仲影響佢健康同情緒, 雖然話比較起一D重病, 佢係好小事, 但有時都難免會諗, 我又唔係要佢識飛天遁地, 我只要求有一個正常嘅身體, 點解都要出咁多問題?

 3隻豬中暫時豆b算係最無事, 希望好好保養佢氣管, 唔好咁快出問題啦, 氣管差導致心臟出毛病機率好大, 年紀漸大就增加危機啦!
不過見到豆b係比從前有好嘅改善, 我嘅努力係無白費:)
佢皮膚毛髮都有改善, 條脷仔都無好似以前咁伸長晒出嚟; 最近朋友講起話原來健康有問題先會長時間伸出條脷仔, 嗰種係唔同散熱大家要留意!

越嚟越覺得健康無價, 真係要小心身體, 一旦健康亮起紅燈, 要改正就太遲!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！