 |
| 相片連結 |
今日同3隻豬做MILKY SPA, 因為代理送咗個新改良嘅濾芯比我, 佢話今次加多咗D濾料及濾網; 新嘅濾網加強咗2層, 而上次嘅濾芯對水質係無改變嘅功用, 但今次濾料係有改善水質嘅效果, 可以令水質變軟及除氯效果唔錯 :)
水質改善咗當然對皮膚係有好處, 多謝代理咁關照, 呢個售後服務我好滿意啊!
今次由大到細排序, 豆b係大家姐, 佢排第一沖涼剪毛!
呢隻豬真係唔好玩啦, 每次同佢無論係清洗、抑或修剪下身嘅毛毛, 總知掂過佢尿尿嘅位置, 都出事㗎!
我明知呢隻豬咁敏感, 同佢清潔都放軟手勢, 只係輕輕咁按摩; 修毛更加小心, 一定唔會過多啦!
今日呢隻豬, 沖完涼又係不安咁兩頭跑, 又將個下身係咁磨, 天呀! 我真係買佢怕喇!!由於仲用緊順勢療法, 唔適合用香薰噴霧, 我見到佢行兩步又係咁磨, 真係頭都大晒!
突然記起上次Mi拎咗兩隻順勢藥物比我, STRESS SUPPORT/ PET CALM EZE, 叫我比隻臭豬波試吓, 睇睇結果如何; 因為個仔一出街見人就吠, 仲比以前緊張咗; 我一連5日都定時餵佢, 可惜全無效果, 我放棄咗喇!
今日諗起呢隻療劑, 即刻拎出嚟比豆b試吓, 好快就見到效果, 佢停止咗再磨!
真係意想不到波波用唔到可以比豆b用, 等我再試清楚, 如果真係夾到隻豬豆, 下次又要入貨!
今日3隻豬都有修毛, 近來少咗做SPA, 達達毛毛無乜進步; 有時我會諗, 其實我咩都唔做, 達達嘅毛毛係咪一樣會變番好?
回望佢過去甩毛嘅歷史, 都好似經歷幾個月就好番; 不過諗吓就OK, 我唔敢乜都唔做, 一定要keep住身體基能良好, 既然Seasonal alopecia 係避唔到, 唯有keep住身體保養希望快D出番毛毛啦!
波波托賴近來身體就無咩毛病, 都係出街會精神緊張啦, 我唯有避重就輕, 揀無咩人嘅時間帶佢一個出去行, 呢幾日都係咁做; 3隻豬齊齊出去都係坐車遊覽, 兩個女暫時都唔太適合落地, 達達椎間盤問題都未好, 脚仔都仲係無咩力度, 都係休息多D好喇; 豆b就要等天氣適合, 空氣質素同濕度都會影響佢氣管敏感, 唔想佢行到扯晒氣咁辛苦, 都係坐車算喇!
每次同3隻豬沖涼剪毛都由早忙到晚, 又無咗一日時間, 不過見佢哋剪咗毛毛睇落精神咗又幾齊整, 咁用多D時間都值得喇 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
