 |
| 相片連結 |
達達毛髮越嚟越差已經係擺在眼前嘅事實, 睇番近幾年佢毛髮生長嘅歷史, 係有跡可尋啦!
2010年發覺佢毛質變得乾旱, 已經第一時間帶佢求醫, 確診係甲狀腺功能低下, 以為食藥後就可以控制到毛髮變差啦; 但見到甲狀腺素控制良好, 但毛髮就繼續變壞, 咁就開始咗上網為達達毛髪尋求幫助嘅生涯!
三年幾嚟, 呢個問題一直困擾住我, 即使嘗試用各種不同嘅方法, 仍然唔可以徹底解決問題; 達達嘅毛髮到特定嘅時間一定有變異, 任我幾早發覺去嘗試阻止, 都無辦法叫停呢個討厭嘅毛髮生長休止期!
正常狗狗都會甩毛, 但甩咗會重生, 會有新陳代謝嘅機制, 係唔會突然生毛停止啦; 但達達咁嘅情況, 甩毛只係個"果", 但個"因"就一直係個謎; 世界各地都有唔少患有脫毛症嘅狗狗, 都只可以接受呢件事, 講得粗俗D係 "硬食"落嚟!
曾經一度見達達甩毛後重生, 以為可以打破呢個縮命, 但事實係佢毛髪變異呢個issue從來都未停止!
今日睇番過去達達毛髮生長嘅歷史, 都好似喺特定嘅月份就開始有變異, 第一次甩毛同重生都嚟得急D, 第二次時間就拖長咗, 但甩毛情況就嚴重過上一次!
近幾個月見到達達呢個討厭嘅循環又再開始喇, 毛髮開始羊毛化, 根據過去嘅經驗, 佢嘅毛毛會無聲無色咁漸漸變薄, 但為時會幾耐? 今次會唔會甩毛後再重生? 真係無人會知!
但我終於接受咗呢個事實, 佢甩毛呢個情況係終其一生都唔會停止喇, 我只希望盡力去幫佢身體強壯D, 等佢有能力去長期打仗, 我一直相信有脫毛症嘅狗狗身體一定有某種原素嘅欠缺, 先會出現呢個問題!
搵唔到原因並唔代表係無問題, 但喺咁唔明朗嘅環境下, 係無可能做到對症下藥喇; 我為佢做嘅都只可以調升佢身體基能, 希望佢身體好D, 將不可為嘅事件變成可以為之!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
