今日帶3隻豬去見Dr.H, 為咗要配合食甲狀腺藥後4-6小時呢個抽血時段, 我set咗起身嘅時間係早上6點 :o
真係好眼瞓, 我又習慣夜瞓, 琴晚到今朝瞓得4個鐘 :(
先餵佢哋早餐, 跟住餵藥, 之後放番佢哋入房再瞓; 我就同老公落樓飲茶, 每次同3隻豬見醫生一定要老公攞假, 反正唔敢再瞓, 再瞓番一陣仲難起身!
今日我早有準備, 帶咗零食等抽血時分散佢哋注意力, 我知道呢個招數達達唔work, 佢出咗街任何食物都引誘唔到佢!
我主要係為咗對twins, 反正次次抽血達達都OK :)
今日先抽波波豬, 佢上次驗咗blood profile, 今次淨驗甲狀腺應該好快, 希望一take OK 啦; 果然有嘢食佢一路都好定, 但臨到最尾嘅2cc, 都係唔合作, 要痛多一次, 要抽埋另一隻脚仔:(
跟住做個簡單body check, 聽吓心肺, 一切正常; Dr.H一摸波波話佢標準身形, 佢依家係1.86kg :)
第二個輪到達達豬, 呢隻刁蠻公主好惡, 一入去就惡到反晒白眼, 呱呱叫啦!
Dr.H猛同佢講我哋係好朋友喎, 唔該乖乖哋合作啦 :)
我就一邊同佢按摩, 一邊同佢傾偈; 達達真係好乖, 枝針插入脚仔後無郁過, 好定 :)
不過佢都要抽2隻脚仔, 我想佢做埋個blood profile!
最後到厚多士豆b, 以為呢隻為食豬掛住食就好容易, 點知佢食食吓都覺得唔妥, 郁咗!
但都好過上次喇, 無尖叫無賴尿 :)
豆b除咗驗T4, 都要做個blood profile, 我仲想佢check埋胰臟炎; 雖然佢D脂肪腫塊係散晒, 但搵唔到原因, A有提我話好似睇過脂肪瘤同胰臟有關, 胰臟係負責消化蛋白質同脂肪嘅器官, 咁都係驗吓較保險喇!
可惜豆b一緊張就難抽血, T4同blood profile已經抽咗兩隻脚仔, 後來出血好慢, 有血塊都應該做唔到啦, Dr.H話睇咗呢D報告再打算!
等報告嘅時間特別慢, 等咗"好耐", 結果會係點???
3隻豬甲狀腺都控制得好好, 達達嘅blood profile都合格, 唯獨豆b.....
報告顯示佢alb偏低, 正常2.3-4, 佢係2, 咁點算?
原因有好多, 例如肝分泌不足? 腸胃流失(ex.腸炎, 胰臟炎)?
腎病? 吸收或其他問題.....
但豆b無病徵, 而肝腎指數合格, 我偏向懷疑佢胰臟出問題啦, 因為佢有過脂肪腫塊嘛, 如果係就慘啦 :(
Dr.H話反正今日都抽唔到血再驗其他, 叫我將佢飲食先調較, 要食低脂餐, 一、兩個月後再番去驗血, 如果alb一路下跌, 就有麻煩 :'(
唉! 真係天有不測風雲, 以為烏雲漸散, 點知只係安樂咗一陣間, 又嚟咁玩 :(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
