 |
| 相片連結 |
同一隻豬浸浴依家好簡單, 唔使彎住條腰咁耐咁慘, 一個月先用一次洗毛液, 工作量真係銳減喇 :)
不過都有用酵素精華幫個仔按摩, 浸浴嘅時候就可以更放鬆去歎喇!
同個仔攪掂晒就放佢哋一齊瞓晏覺, 多謝Mi幫我買咗新嘅靚靚迪迪尼隔尿床單, 真係好鬼靚啊!
放佢哋一齊後我出去整理番部機同D用品, 點知就聽到佢哋好嘈吵, 原來3隻豬顧住玩唔瞓覺 :)
已經好耐無咁玩喇, 自從達達腰椎有事, 佢心情唔靚都唔肯玩, 跟住又到豆b頸椎, 佢要玩我都阻攔啦; 但見到佢哋3個恢復番以前嘅狀態, 我唔想、亦唔忍心唔比佢哋一齊玩; 希望豆b識就住自己條頸啦, 佢玩起上嚟真係好用力咁撞, 係傻㗎;)
反而達達就聰明好多喇, 見波波來勢洶洶肉肉緊緊咁衝埋去, 會大聲喝止, 然後坐低借力, 唔同隻豬豆一玩就忘晒形啦!
都係要比佢哋玩啦, 咁多規管生存有乜意義吖, 希望唔會又好心做壞事, 萬望3隻豬唔好又整親呀!
豆b精神狀態真係唔差, 胃口腸胃都好正常嘛, 如果唔係驗血報告話我知, 我完全唔發覺佢身體有異狀啦; 越嚟越懷疑係藥物影響到佢免疫系統失調, 攪到咁煩喇!
雖然唔敢肯定呢個因素是否成立, 亦唔識呢類藥物有無相關, 但我'希望'係啦; 停藥後佢嘅腫瘤全部散晒, 希望下次去驗血都係有好消息啦!
無宗教信仰嘅我每次都只有向天禱告, 祝願佢哋平安過關!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
