 |
| 相片連結 |
天氣咁熱真係唔想出去, 喺屋企歎吓冷氣最好!
有3隻豬作伴完全唔會悶, 睇住佢哋追追逐逐都好有樂趣, 尤其見到達達咁活潑, 同以前分別好大, 雖然佢未克服到行地磚, 但起碼情緒唔差!
雖然佢哋身體多多毛病, 有時會好驚, 壓力大到問自己點解要養狗狗; 但當一切穩定落嚟, 所有毛病都在控制之下, 可以喘一口氣嘅時候, 就所有辛苦擔心都唔記得晒, 就係咁望住佢哋已經好滿足, 睇住佢哋嬉戲係最大娛樂, 我最享受呢種平靜嘅日子啦 :)
我咁有閑情睇住D豬仔玩, 皆因豆b嘅腫塊全部都細晒, 之前有成2cm咁大真係好驚, 仲要唔係生喺皮下, 唔擔心就假啦; 其實豆b嘅腫塊有兩種, 其中兩粒係之前打針留下, 總係唔散(達達用咗順勢藥有細咗, 但都仲有一細粒留下唔散, 反而波波成半邊鵪鶉蛋咁大嘅腫塊完全散晒), 呢類腫塊變惡性腫瘤機會唔大, 只要無再大都唔係太驚, 今次我係驚果D生到深入肌肉嘅腫瘤啦!
一直都幫豆b用冰敷, 唔敢按摩亦唔敢用藥搽, 怕刺激咗呢D唔知係乜嘢腫塊嘛, 雖然Mi有建議我試用順勢藥膏搽, 但我唔敢啦!
我有keep住檢查, 發覺D深層腫塊有越嚟越細, 而皮下嗰兩粒就相反; 初時發覺表面紅腫咗, 又比之前大, 咁情況下我想試吓用順勢藥膏喇, 其他果D腫塊當然唔敢掂啦!
多謝Mi做我順勢療法嘅私人consultant, 又幫忙訂藥, 真係要乜有乜呀!
 |
| 皮膚唔紅, 無咗膿血平番好多喇！ |
搽咗一次之後, 兩個鐘後再檢查, 細嗰粒無咁紅喇, 大嗰粒就穿咗, 見到有D膿同血水流出嚟, 我抹乾後用消毒藥水清洗, 再用藥膏繼續搽, 見到一日好過一日喇 :)
真係古怪, 都唔知點解會咁奇怪!
 |
| 見到豆b條頸可以咁轉都知佢無事喇！ |
至於豬豆條頸, 都無惡化; 經此一役後我更小心啦, 同佢哋梳毛抹嘴我都一定用手止支持住佢哋嘅頸仔, 我怕怕喇!
達達腰椎仍穩定, 間中都有脚震, 但對佢影響唔係好似之前咁大, 佢有番信心兩頭行吓喇!
波波一直keep得唔差, 我唯有打醒十二分精神湊佢哋啦, 希望小心再小心keep到唔惡化!
今日再幫達達做milky spa 見到朋友加咗死海浴鹽, 我又心動喇; 但好怕好似上次咁浸到黐立立, 又要再洗一次就死啦, 我唔怕煩都唔想咁折騰達達嘛!
真係多謝Mi, 佢從美國訂咗一隻死海浴鹽話唔錯, 比咗D我試吓; 用完真係覺得超正, D毛好蓬鬆呀, 下次我要訂樽大號裝先得啦 😄
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
