 |
越嚟越覺得要養好一隻狗狗唔係一件易事, 細時太柔弱, 抵抗力會差D; 到年紀漸大, 又好多毛病走出嚟 , 狗狗一生嘅黃金時間好短暫, 要知無病無痛健康嘅日子有幾耐 - 係無辦法預期!
當然會有人養得輕鬆, 有人養得毫不經意, 狗狗都活得健康長壽, 能夠有呢種幸運, 我衷心講句恭喜!
但幸福唔係必然, 唔係話做得多D, 得嘅結果會成正比!
我同意自己嘅性格都係部份主因, 決定咗要挑幾重嘅擔子, 但命中注定你遇上邊隻狗狗, 要為佢付出幾多, 就係天意!
自問我養狗狗從來都唔會隨意, 反觀過去養狗狗嘅歷史, 除咗第一隻狗狗bebe, 我喺養得算輕鬆寫意, 因為當初我係講唔上愛狗狗, 甚至係怕得要死, 處理感情上嘅負擔就較容易!
但感情係可以慢慢培養出嚟, 由我唔敢掂bebe, 唔敢比佢行近我腳邊, 到最後愛上佢; 幸運嘅係當時我唔識點養狗狗, 所以全無壓力, 只知道買包狗糧餵飽佢就ok; 帶住佢通街跑, 惹到蜱虱就帶去美容院處理, 從無擔心過浸藥水有毒性嘅問題, 更家唔識咩叫牛蜱熱, 換轉今日, 我一定被嚇死 !
慶幸bebe年青時尚算健康, 身體唔算多事, 我輕鬆咗好長嘅一段日子, 記憶中好少需要去見獸醫; 直到佢9歲高齡我嘅惡夢先開始, 嗰年幾中見佢抽筋, 心臟病直到離去, 我嚐到照顧一隻有病狗狗嘅滋味, 無助, 傷心, 終日承惶承恐怕有日同佢分離!
bebe走後成個家陷入死寂, 好似無晒生氣; 本來無勇氣再養狗狗, 但更難忍受嗰份寂寞冷清, 於是再養咗安安!
此後養嘅每隻狗狗, 一隻比一隻多事!
一來自己心態同之前完全兩樣, 由開始抗拒接近, 已經變咗個狗痴!
養嘅方式有咗改變, 見過狗狗病重嘅情景, 就變成草木皆兵, 會留意到好多小毛病, 壓力就隨之而嚟!
可以話我唔係太幸運, 安安bb就嚇到我失晒暈, 要住院吊針, 之後一路都腸胃敏感, 屙嘔頻頻, 呢D就係命運; 之後, 到後來養嘅3寶, 到呢3隻豬, 我越養越上心; 見得越多有越多疑問, 學得越多就越擔心!
養狗嘅經驗多咗, 以為做足預防就妥, 去到養呢3隻豬, 反變得好事多磨！
全部都係做得足咗, 但就無預期嘅好結果!
養呢兩隻豬一開始就令我神經緊張, 之後仲一樣接一樣發病, 細毛細病唔在講, 仲確診有甲狀腺低下呢種長期病; 達達又有脫毛症我已經好心傷, 點知仲要椎間盤出埋問題, 逼住我要奮力去打仗!
到豆b嘛, 一早知道佢氣管弱, 亦預咗佢都會有遺存甲狀腺病, 從佢踏入我屋企, 已經決定要比心機湊好佢; 但萬萬諗唔到佢都要頸椎出事, 仲要無端端生出幾個懷疑係"脂肪腫瘤", 攪到我好驚, 係驚唔知D腫塊係唔係真係只有脂肪!
真係無辦法釋懷, 個心總係七上八落, 隻豆氣管塌陷唔可以做麻醉, 做唔到切片檢查, 只可以做簡單抽針化驗, 即係唔可以得到確診; 雖然琴日聽咗化驗所報告腫塊係無細菌, 但都唔係無惡性腫瘤嘅可能, 而且佢嘅腫塊生長係從肌肉深層, 我點會唔擔心?
越驚越亂越擔心, 網上猛搜尋, 好似藥石亂投, 亂碰亂撞, 咩都想試下!
還好有旁觀者清, A叫我暫且將一切按下, 等耐少少睇清楚方向再作打算啦!
正常我都可以比到一D中肯嘅意見他人, 但事到臨頭, 心亂起嚟真係會亂諗!
越上心就越擔心難放心, 養呢3隻豬真係壓力好大, 全因為已經偏離咗係養寵物嘅心態; 當你嘅家人、 仔女有病, 嗰種心情係點, 其實並唔難理解!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
