今日真係好開心, 想得到嘅終於都可以得到, 雖然唔係咩大件事, 但得到朋友幫忙, 圓自己嘅心願, 感覺就係唔同 :)
要大大聲多謝A, 幫我訂咗個浴筒, 其實都幾轉折, 因為淘寶直送香港好貴費用, 最衰個浴筒集中偏遠地區, 又諗唔到細細一個浴筒連包裝會係咁重, 仲話可能運費要跟體積計, 咁就可能要更高費用; 諗住淘寶貨價唔高,又無諗件貨會咁重!
我雖然係好鍾意呢個筒, 亦唔係負擔唔嚟 , 但有無必要, 值唔值得用咁貴嘅價錢去運送?
事源上次行寵物展, 最深印像竟係一個狗狗用嚟浸SPA嘅浴筒, 呢個筒當時係一件贈品, 隨部SPA機贈送; 我已經有SPA機, 就算無都唔會因為一個浴筒, 就隨便對一部SPA機心動啦!
都有問過可唔可以單獨出售, 係可以 - 但唔係一個普通浴盆嘅費用!
我就係咁衰啦, 離開展覽場地就越諗越鍾意, 用呢個浴筒幫3隻豬浸milky spa幾近完美, 大細高度都適中; 如果用一般BB浴盆唔夠深度, 用我依家用緊嘅膠箱, 高度算ok, 但無活塞去水, 要翻箱倒水都頗重, 一下唔小心閃親條腰就陰功!
3隻豬以前浸蘋果醋、沖涼過清水都係用筒, 細細個高度深D, 好似有嘢包圍住, 佢哋會感覺舒服; 依家用個膠箱面積比較大, 佢哋都係縮埋一角, 安全感無咁高啦!
但一般細筒要加上spa機嘅喉管, 又唔夠位用, 又無可能用個大水筒嘛, 呢個浴筒前低後高真係好適中!
要再一次多謝A, 佢幫我用最慳錢嘅方法付運, 今日收到個浴筒喇, 下次浸spa就大家都舒服啦, 我唔需要用力翻箱倒水, 3隻豬又唔使縮埋一角, 應該會更放鬆 :)
 |
| 3隻豬習慣用筒㗎! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
