 |
| 3隻豬有阿四貼身服侍梗係歎啦! 相片連結 |
但今年同中秋好接近, 咁今年生日一齊慶祝, 又食月餅又食蛋糕啦!
一年一度3隻豬嘅生日係我嘅大project, 咁都係唔少得個生日蛋糕啦, 今年我心血來潮提早咗搵資料, 要睇吓今年去邊間狗狗餅店訂蛋糕嘛!
嘩! 祇係一年之差, 糖偶蛋糕大幅度漲價, 要做一個靚靚糖偶蛋糕要$800 - $1000上下, 因為3隻豬, 凈計3個公仔都要四 、五佰, 然後逐樣計價, 咩材料, 咩裝飾都唔同價格 :(
仲要當我講出預算取餅嘅日期, 有兩間竟唔接訂單, 佢哋要趕出月餅啊, 好彩提早問問咋!
問咗好幾間, 價錢都係差不多啦, 但用成千蚊去做呢個蛋糕, 老公話唔實際啊!
話時話啦, 依家D蛋糕好似變咗件藝術品, 個主題變晒, 好似著重於個設計多過個蛋糕嘅用料, 有少少本末倒置 feel :)
如果用一件藝術品嘅角度去睇, 真係好難定個價, 唔可以話貴啦; 自己都會做下手功, 就明白呢D心機錢唔容易賺, 不過有無必要D錢咁花, 就見仁見智啦!
老公話糖偶蛋糕我已經做咗兩年喇, 都叫做有過啦, 根本做呢種蛋糕對3隻豬全無意義, 食用嘅部份佔好少嘛, 3隻豬咁鍾意食龍躉魚, 用呢筆錢買魚都有排食喇 :)
但我又唔鍾意一般餅店嘅design, 睇落唔吸引嘛!
Mi同A都提議我自己做, 仲真材實料啦; 但....我一諗起就覺得煩, 淨係要將蛋黃蛋白分離, 打到蛋白企起呢個步驟, 就煩死我喇！
都係死心不息繼續搜查, 睇吓仲有無其他選擇!
真係多謝某間狗狗餅店比咗我idea, 原先我係問佢哋想做細size嘅蛋糕, 因為每年3隻豬都係食唔晒嘛, 要丟就真係好浪費啦;今年仲適逢三日後係中秋節, 又要食月餅, 咁點食得晒吖!
唔敢食咁多餐, 放耐咗又驚變壞, 陣間腸胃炎仲慘!
呢間餅店話放3個公仔唔可以做細喇, 要足夠地方先放得下, 建議我考慮做cupcake啦, 細細個就唔怕浪費喇, 做幾個放埋一齊都好靚, 又可以做到靚靚嘅裝飾㗎!
呢間餅店有一個賣點, 就係3D公仔唔係用翻糖制做, 佢話反正翻糖公仔唔適合狗狗食用, 要永久保留個公仔留念, 佢改咗用黏土做呀, 佢話會用膠膜將個蛋糕分隔, 公仔唔會接觸到個蛋糕啦!
真係good idea, 咁我自己都可以試吓喎, 反正我都鍾意做手功嘛, 雖然未必有人哋做得咁靚, 但慳番D銀紙買龍躉魚比佢哋食仲好啦 ;P
可以諗諗, 可以試吓, 不過依家日日都咁忙, 服侍3隻豬都唔夠時間, 未必OK啦; 等我搵到個簡易嘅做蛋糕食譜先, 唔成功再算啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
