3隻豬好似日日都有麻煩事, 真係想死 :'(
今日幫豆b梳毛, 發覺佢背脊腫起, 有兩個瘤狀物體, 係我之前一直無為意? 我日日都摸住佢哋, 有咁大個瘤我點會唔知; 但今日一摸, 個心即刻沉咗落去, 再摸摸前胸, 都有一粒, 死啦點解會咁多? 真係虧我話自己咁小心, 原來都係大意!
近來成日同豆b見醫生, 都全身摸嚟摸去, 咁明顯醫生無可能唔話比我知, 咁短時間點會變得咁多, 大得咁快? 琴日我都未發覺有呢D, 好驚!
好自責我有疏忽, 點解唔一早發覺去就醫? 但阿女話佢每晚都卒豆b毛毛, 肯定琴晚都無事!
近日太多狗狗罹患癌症, 我都睇到膽顫心驚, 已經盡可能幫佢哋打好底子; 又話黑酵母可以預防惡性腫瘤, 3隻豬一直都有keep住食, 都食咗有年半多D啦!
唉! 要嚟嘅真係逃不了, 要發生嘅想避開真係唔容易!
第一時間call Hsiang醫生, 帶豆b去就醫, 但都要再等幾小時, 又開始行唔安坐唔落, 天呀, 真係厚多士(好多事)!!
好唔容易挨到夠鐘, 到達診所就心都離, 今日老公有嘢做唔可以陪我, 多謝A又鼎力相助, 佢話會出去診所.
多謝呢份支持呢份關心, 我都唔再講多, 銘感厚意!
再多謝V同Mi都咁關心, 一路支持!
Hsiang醫生檢查過後就叫我先唔好擔心, 憑經驗去睇似係脂肪發炎, 睇落病徵亦同豆b相似, 呢種病例係嚟得好快, 腫塊唔係生長於皮下, 係來自肌肉底下深層; 今早我檢查時就係發覺生得咁深入, 我先驚到死 :(
但呢種又唔係脂肪瘤, 係關於免疫力問題, 聽到我頭頂一舊雲, 其實究竟係乜嘢成因, 都不明所以!
我都做盡一切去提高佢哋免疫力, 仲可以做D乜?
Dr. Hsiang抽咗少少組織出嚟, 做一個初步抹片檢查, 先睇睇有無細胞異常, 然後再要送化驗所進一步檢查, 睇睇有無感染細菌!
顯微鏡下只見到白血球同脂肪, 同推斷脗合 :) 醫生話之前佢都有遇過呢種病例, 手術切割後化驗都唔屬惡性腫瘤, 所以唔使咁擔心!
當然想確診一定要做biopsy, 想醫理就只有做手術; 但Dr. Hsiang唔建議咁做, 因為割後都有機會重生, 而最主要係豆b嘅氣管塌陷嚴重, 麻醉高危!
先後3個醫生都話豆b未必過到麻醉呢關, 既然係咁, 叫我當無事發生!
反正豆b唔痛一齊如常, 呢個病亦唔會致命, 係摸落有腫塊令我不安, 現階段我都別無選擇, 只好由得佢喇!
等化驗報告出咗再算, 或者可以試吓另類療法, 再諗諗!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
