聽日又到咗同3隻豬去驗血嘅日子, 雖然係常規檢查, 但個心都係有D忐忑, 希望順利完成取血程序, 3隻豬唔好太抗拒, 今次帶備零食, 睇吓氹唔氹到佢哋啦; 當然最最重要, 係希望個報告靚仔, 等我可以舒番口氣!
似乎近日我頭上嘅烏雲已續漸散去, 豆b嘅腫塊接近絕跡, 要好留心先摸到仲有少少凸起, 我諗佢都有唔錯嘅自愈能力, 似乎D補充品都幫到吓卦; 佢條頸仔都好似正常番喇, 見佢嘅步姿同形態都再無異樣, 我安樂晒!
達達豬近來好趣怪, 睇落佢仲有好大嘅進步空間, 希望係D supplement 針對到佢嘅病患, 物理治療又幫到啦!
見佢打泰拳時條腰仔都好有力, 今日仲試過好勇敢咁離開地氈行; 不過佢咁勇我好驚㗎, 好怕佢又扯傷條腰仔啦, 但唔可以無止境咁限制佢活動嘛, 唔比佢行對脚仔咪廢晒!
即刻為達達公住鋪上長地氈, 咁佢哋行嘅時候壓力無咁大, 都只可以咁保護佢哋嘅關節, 亦希望保住椎間盤唔好惡化啦!
波波呢排都算托賴, 無咩麻煩, 都會同豆b, 達達一齊玩; 我但願咁平靜嘅日子會維持一段長時間, 都明白人無千日好, 花無百日紅嘅道理, 況且佢哋年紀漸大, 就嚟8歲喇, 我預咗健康會走下坡啦, 不過仍希望盡能力將佢哋身體基能提高, 延緩老化!
