最近又無間斷咁聽到獸醫界有醫療失誤, 都唔知點做評估, 無錯有時意外係估唔到, 醫療途中出現意外, 有時係欲救無從, 只可以嘆句生死有時, 今生功德完滿, 係時間踏上歸路!
但近日從網上, 從朋友口中, 從自己親身接觸主人口述, 聽到嘅都好似係醫生出錯誤, 不過唔係自己親身經歷, 道聽塗說好似對獸醫有不公; 但聽返嚟嘅事例, 如果真係有如主人嘅描述, 對獸醫界真係信心失盡!
都明白獸醫一日處理無數咁多case, 一個常人間有疏忽唔出奇, 但呢個行業掌管住生命, 真係唔可以兒戲; 生命交到獸醫你手上, 就直接間接係由你操控生死, 有小疏忽都可能導致好大件事!
今日從網上睇到嘅呢單case, 我就好奇怪點解主人兩次提及狗狗做完治療後有失禁, 獸醫都無懷疑? 仲要繼續呢個療程, 攪到後果咁嚴重先終止, 到呢個階段先話狗狗唔適合呢個療法, 係咪太遲?
http://orientaldaily.on.cc/cnt/news/20150422/00196_001.html
http://orientaldaily.on.cc/cnt/news/20150422/00196_002.html
 |
| 相片來自網上 |
朋友亦講咗另一例子比我知, 主人用咗7萬蚊幫狗狗做椎間盤手術, 術後留醫15日, 完全無進食, 身體變弱可想而知; 寵物醫院最後決定比狗狗出院, 希望返到屋企狗狗較relaxed, 會肯進食, 呢個做法都無可置疑; 如果評估過狗狗適合出院, 咁做都算正常事; 問題係出院時醫生開咗抗抑鬱藥, 喺返屋企後主人餵藥比狗狗, 狗狗竟魂斷於半小時!
主人傷心之餘, 更不明所以, 點解喺留醫期間無比呢隻藥, 要留到返屋企? 死亡係藥物敏感所致? 都不得而知, 如果真係藥物敏感, 喺留院期間急救仲有一線生機, 咁情況下先帶狗狗返去醫, 已經係太遲 :'(
但真實原因為何, 根本不得而知, 理論上狗狗身體狀況係唔礙事, 咁先會出院嘛, 但出院到失救, 相差只係嗰幾小時!
主人用咗大額金錢, (可能我無錢啦, 7萬唔算小數目), 期間頻撲躭憂, 非筆墨可以形容, 狗狗又白捱咗手術痛苦, 到頭來....件事不了了之, 但主人就得到不能承受嘅痛!
仲有之前寵物公園遇到嘅狗狗, 得10個月大, 獸醫手術評估錯誤, 用咗一支過長螺絲, 竟穿肉凸咗出嚟, 主人探望見到紗布滲血先知; 唔知係咪知道太遲, 導致神經受損? 肌肉萎縮? 問唔到正確原因, 但做咗手術共5次!
見到狗狗隻手幾近殘廢, 都唔知仲有無得醫, 一個人為錯誤, 狗狗有可能終身殘廢, 佢得10個月大, 未來仲有咁長嘅日子!
仲有幾件慘事, 狗狗都魂斷於獸醫院, 當然主人講述, 唔係正常病發醫唔到, 係錯誤判斷醫療事!
聽到真係好心罨, 亦再一次慨歎獸醫體系嘅良秀不薺, 究竟係咪咁難遇到個好獸醫? 斷唔會咁多主人係篇個故事, 傳心抹黑D獸醫卦?
我仍然相信有好獸醫, 養狗狗咁多年自己亦遇過痛苦嘅事, 但都遇到良心獸醫!
萬望主人相信獸醫之餘, 自己都要保持住清醒頭腦, 當然事到臨頭會急到咩都諗唔到, 咁就停一停搵朋友商量, 多個人都多個腦嘛; 旁觀者清, 可能小小一個提醒建議, 可以選到個正確方向醫治!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
