 |
| 相片連結 |
咁多日無寫blog就知我幾忙, 日日都攰到死, 無工人姐姐幫嗰幾個月都好少自己煮食, 大都係出去; 依家姐姐嚟咗, 完全唔識煮食, 正確講係佢識煮嘅我唔啱食, 就要從頭教起, 每款餸菜要示範一次!
每日都示範, 即係變咗日日要我煮, 最憎烹飪, 好死; 希望呢個姐姐catch up快D!
呢個姐姐清潔係做得唔錯喇, 最主要係跟足我指示, 尤其係豬仔個圍欄, 我要佢做足每一件事 !
要每日將床仔刷好, 有毛毛佢哋吸咗唔好, 結埋容易嘔吐嘛; 要將膠墊移開清潔地下, 有時佢哋尿尿會移位, 唔痾正片片會落咗地度; 吸塵, 蒸氣再用布抹乾, 清潔好膠墊再全部放番好; 豬仔用呢個範圍我頗執著, 一偷懶我揭起塊膠墊實知道!
暫時姐姐都跟足吩咐去做, 因為我避咗唔用清潔劑, 唔想豬仔接觸咁多chemical, 所以一定要咁做, 唔係就點都有氣味去唔到!
雖然松鼠狗無咩體味, 但3隻豬日日喺屋裡, 都係徹底清潔D好, 起碼每個嚟過我屋企嘅人, 都話我屋企無狗味, 個個都讚好 :)
以前嘅姐姐好多時我都要跟手做, 依家姐姐就做得幾好, 但會維持幾耐呢個工作態度, 仍係未知之數!
見佢做得都幾開心卦, 因為成日有免費歌曲鑽入我腦 :(
不過如果佢細聲D唱就更好 ;)
琴日又做大project, 3隻豬浸微泡, 浸浴唔係問題, 無咩要做, 但最耐係要吹乾毛毛!
3隻豬唔剪毛個樣好潦倒, 琴日仲要剪埋毛, 真係攰到要坐喺度 :)
 |
| 豆b唔剪毛真係亂到無譜, 好潦倒 :) |
3隻豬剪毛合作度都無之前咁好, 但呢D係條件問題, 可能年紀大咗太耐企唔到, 我由得佢哋坐低好瞓低都好, 又唔係出賽, 話知剪得唔好, 整齊D算數!
琴日達達好似有D唔舒服, 浸完浴有D鼻水, 夜晚嘔咗一次, 餵咗佢一次順勢藥後, 經過一晚休息, 今日都幾好, 希望無事啦!
好開心達達毛質毛色持續變好, 今次嘅毛毛休止期平安過渡, 跳過咗最差果段時間, 今次無黑皮膚, 無甩好多毛!
依家背部已經無晒黑毛, 除咗頸位仲有少少喺度, 達達今次只係毛質羊毛化, 同埋薄咗, 比起上次好大進步!
雖然毛量仍未改善到, 但毛毛有番光澤喇, 起碼今次佢無黑皮膚亦無差不多甩清晒毛毛, 可以skip咗最差嗰段路, 就直接變好 :)
感恩有呢個結果, 我覺得已經好好, 睇黎微泡浴真係有幫助, 當然順勢療法都夾到啦!
仍要繼續用順勢療劑+浸微泡, 希望達達好快就生返晒靚靚毛毛!
波波就時好時唔好, 側身仍未改變到, 反正佢無其他問題出現, 决定停用抗生素; 琴日試用順勢療法肌肉勞損嘅藥, 又睇吓幫唔幫到啦!
呢期豆b最爭氣, 要好好keep住保佢好!
 |
| 兩隻豬又玩到癲晒, 好生猛！ |
兩個羊毛氈相架已經做好, 今次自己頗滿意, 算係我能力範圍做到像真度最高, 不過我係神經刀, 無能力次次都做到; 呢對twins係好耐之前開始做, 達達嘛, 要得閒少少先可以做, 希望都會做得好啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
