去一趟寵物公園後續功夫真係好多, 事關我緊張程度實在過火, 除咗離開公園前同佢哋每隻簡單咁檢查過, 返到屋企清潔梳毛一定唔會少囉; 然後再仔細檢查, 惹到牛蜱熱唔係講笑喎!
今日都仍要再重覆檢查多次, 驚走漏眼會惹禍, 每隻豬仔逐吋梳毛, 用手全身摸過, 即使有牛蜱移除得快, 隻蜱都未必會夠時間將毒素散播; 4-6月係蜱虫嘅活躍期, 真係要小心D囉!
 |
| 剛再檢查過, 3隻豬一臉無奈 :) |
工人姐姐嚟咗, 我又多番時間做自己嘢囉, 只係晚飯時間仍係好忙, 感覺兵荒馬亂, 姐姐對煮家常小菜都係未得囉; 每個人都有專長, 其實有一兩樣做得好已經唔錯, 好過樣樣半桶水無件算做好咗, 唯有比多D時間帶佢囉!
姐姐洗熨都算合格, 清潔一直做得唔錯, 今時今日請到個工人肯主動去做已經好感恩囉; 不過呢個姐姐會有主動要求, 同過去嘅姐姐唔同咗, 當然同媽姐時代更無得比囉; 以前會諗....嘩, 乜咁多要求, 依家就會轉個角度, 從佢方向諗諗, 爭取自己想要嘅都唔算係錯!
當然我都佩服佢咁勇, 只求日後唔會越要越多, 越嚟越過火!
時移勢易, 工人嘅地位同以前確係唔同咗, 雖然工種大致相同, 但人種都隨住時間而有所改動, 依家一般家庭都多數請外藉傭工; 人種唔同, 教育觀念都唔同, 希望互相適應會少咗矛盾!
我都做咗好大改變, 嘗試盡量配合, 想自己從細嘅家庭教育, 係慳得就慳, 唔好養成浪費習慣, 要我用一湯碗油炸一次雞翼, 咁就倒咗, 我O嘴囉!
無辦法, say no 會多磨擦, 同佢講佢都話little bit only, 唯有學習無眼屎乾淨盲, 反正只係使費多咗嗟!
阿女同老公都講得啱, 用工人就無得慳, 唔好指望佢哋會幫你節省, 世上無免費午餐, 想有悠閒時間, 就要付出交換代價!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
