早幾日喺FB得聞有松松食潔牙骨出事, 意外將大件潔牙骨呑下,食物架咗喺心臟上, 聽到都知要拎出嚟唔容易, 呢隻松松都係細身品種, 體重得1.8KG; 因為身體太細, 如果做手術風險相對高, 醫生話手術中途有機會導致食道裂開或心臟停頓, 情況唔樂觀可預知!
但情況係無得揀, 確認有需要進行手術, 最後由醫生轉介咗去灣仔專科醫院, 因為嗰度先有咁細嘅內窺夾, 去嘗試將異物夾出嚟, 當然風險唔細!
我唔認識狗狗主人, 係網友嘅朋友, 但完全感受到主人嘅心情; 嗰種擔心, 嗰種心痛, 手術中等待嘅煎熬, 有幾惶恐, 可想而知!
雖然唔相識, 都一樣關心狗狗, 一路追住FB, 自己唔係教徒都向上天禱告, 萬望狗狗大步檻過, 要手術成功!
好感恩狗狗最後係手術成功, 大團圓結局!
跟住呢幾日, 一樣喺FB得知有狗狗有類似意外, 台灣有隻松松, 可能因為食飼料太急忙, 狼吞虎嚥下噎到, 一下間就瞓喺籠中唔識郁動, 結果咁就走咗.....
今日, 又再聽聞有隻西施, 一日前參加狗狗活動, 似係哽到; 主人有提到喺場地見到有噎到嘅徵兆, 今早帶去睇醫生, 有利用角度等令狗狗將將肉片吐出; 見到嘅係一整塊圓形嘅雞肉片, 可能太大塊, 醫生有交待傷到氣道, 叫小心觀察!
傍晚時狗狗都仲似正常, 但臨瞓時再餵藥, 發現全身僵硬, 已經離開咗喇.....
似乎兩隻狗狗被發現有問題都唔係於第一時間, 點解會發覺時身體已變僵硬咁陰功?
養狗狗餵食係好重要嘅一環, 無論選食材, 食物嘅大細形狀, 都直接影響狗狗嘅生命狀態; 所以3隻豬嘅食糧, 我一直唔敢假手於人, 每日自己分配好, 就算工人姐姐幫我蒸好肉, 我都係自己切到好細塊, 加supplement呢D旁人就更加眼看手勿動啦!
狗狗見到食物大都心急, 怕咗有時佢哋會大大啖係咁吞, 想避免意外哽親, 做得到嘅都只可以盡量將食物切幼細!
當然咁做係希望可以將風險減低, 但唔教好狗狗, 其實作用都唔係太大!
我餵食時一定將3隻豬放喺自己嘅視線範圍, 萬一.....唔好彩有意外發生, 都可以第一時間諗計, 嘗試急救嘛!
好似上次豆b疑似哽親驚雲, 我就好快check到係D番薯黐住佢個上顎仔!
大家真係要小心, 餵食時真係要望到實, 自己餵食小心之餘, 奉勸一句都唔好餵零食比他人狗狗, 亦唔好比自己狗狗食其他人餵嘅食物, 要與眾同樂分享零食, 請交比主人啦!
生命無take two, 餵食一定要謹慎, 一時大意做成遺憾, 後悔太遲!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
