 |
| 3隻豬要忍耐多D囉! |
工人姐姐已經做咗半個多月, 今日第一次帶佢去街市, 一路行叫佢好好認路, 去到街市每樣食材講解, 好多嘢佢都話唔識; 咩係紅菜頭, 咩係椰菜花, 佢連芋頭同番薯都掉亂, 講到我氣都咳晒就快斷氣!
買好晒今日所需就番屋企, 點知一踏入門口, 姐姐放低所買嘅物品, 即刻話要返房休息....
已經係大熱天時, 買咗魚同肉都要處理, 就算咩都唔做都要先放雪櫃, 原來未出過國嘅姐姐要樣樣提點住, 真係乜都唔知！
佢話有上過training course, 無教過咁簡單常識?
抑或係佢咁唔衾捱, 去一轉街市就頂唔住? 比較起嚟好似應該係我攰D!
我同佢上咗一堂家政課, 從選擇食材開始, 講到口水都乾; 返到嚟就開始分配食材, 點知佢無一個唔該, 放低食物就同我講要去休息, 好似有D那個喎; 咁佢又唔係懶惰嘅, 真係唔識形容, 滴汗!
 |
| 努力睇食譜中 |
又要同佢再上課, 話佢知魚同肉要放雪櫃呵, 豆腐如果酸咗, 就唔食得囉.....
真係樣樣都要教, 從零開始, 好辛苦啊!
佢今年35歲, 做兩吓又要午睡又要休息, 我有D擔心未來嘅日子.....
呢個姐姐唔似吳下阿蒙, 佢好識為自己爭取權益, 每日要飲兩次咖啡, 假日要煮嘢拎出去食, 牙膏沐浴用品都要求供應; 但話佢醒目又唔係, 總之係唔識做, 完全唔識物理人情!
以前我會唔高興, 但依家覺得佢明刀明槍要求, 好過佢做表面功夫, 實質另有所圖, 我依家知道原來有D人可以做戲成精!
佢人都屬純品, 算係受教肯聽, 唔係太過份要求, 我比佢滿足回應!
原本今日會同3隻豬仔去公園, 咁攪一攪全部計劃被打亂, 工人姐姐無我在旁提點, 無可能自己一個會攪得掂, 兩餸一湯對佢已經好大挑戰; 唯有自己出手, 又醃又切 :(
3隻豬唯有忍耐, 不過天氣再熱, 又唔適合中午去公園, 傍晚又多狗狗, 又要另作打算!
 |
| 今日無辦法出去喇, 自己玩啦! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
