 |
| 相片連結 |
工人姐姐已經嚟咗兩星期, 好多嘢都熟習, 做家務已經搵到自己模式, 快手好多喇, 變相就多咗好多休息時間; 我唔係嗰種一日到黑要工人唔停手嘅僱主, 只要佢盡到職責, 我比佢足夠自由時間!
不過玩電話呢家嘢真係好大嘅誘惑, 相信時下嘅姐姐個個都係咁玩,其實佢已經好多私人時間空間, 仲要拎埋手機入廚房邊做邊玩, 我覺得唔好啦; 不過我一踏入廚房, 佢都識即講sorry, 話以後唔會再犯, 我一句都無話佢喇!
針無兩頭利, 相對上一位姐姐, 我就從來未見過佢喺我面前咁玩, 但呢個所謂優點, 幫唔到我啊!
只要新姐姐應付到佢嘅工作, 我選擇隻眼開隻眼閉算喇!
姐姐做家務漸上軌道, 所以多番時間, 又可以好似以前咁同3隻豬仔去街街!今日同3隻豬落樓下跑一跑, 唔使成日屈喺屋入面咁悶啦, 琴日見佢哋喺屋企玩, 好快就走咗去瞓覺!
又比波波嚇一嚇, 唔通落去跑時又整親? 一伸手掂佢就叫喇; 睇見佢仲好似有D行動僵硬, 個身又側番 :'(
哎呀, 唔好咁玩啦!
即刻同佢照紅外線, 跟住做埋場效應治療, 唔少得用順勢藥打底啦, 希望做得快, 唔使餵西藥都好得番, 我真係日日都好似要食驚風散!
好彩攪完一輪佢似鬆番, 有胃口食晚飯, 會繼續做物理治療, 再加多幾日順勢療法!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
