天氣一連凍咗好幾日喇, 我同3隻豬都唔敢出外, 最高享受都係窩喺被竇啦!
連日來波波同達達就開心喇, 老公話天氣凍, 比佢哋上大床, 兩隻豬擠喺我嘅身邊, 係咁用個頭仔猛揩, 非常滿足; 豆b仍留守床仔, 不過當然為佢做足保暖工作, 但其實個心都係有唔安樂, 好似對佢唔公道嘛; 但勉強會令波波更仇視豬豆, 養埋豬豆從來唔係佢嘅意願囉!
係我嘅錯, 一開始忽略咗波波, 從來萬千寵愛在一身, 點會肯將媽媽嘅愛分薄咗, 呢個仔又極為小器, 我如果再對豆b表示關愛, 個仔會更覺得佢係嚟爭寵, 日子就更難過!
近來達達開始識爭寵喇, 明顯覺得波波唔開心, 同達達關係疏遠咗; 有好幾次達達吖吖叫時波波會發惡, 會突然暴衝過去好似想開火, 還好從細培養嘅感情牢固, 佢會忍住唔發作, 最多都係嚟個碰撞!
但明顯波波唔想梳化比達達獨霸, 呢幾日見到達達上梳化, 佢都會跳跳扎要上去坐!
 |
| 我件遠紅外線披肩都係比佢哋用多! |
早前擔心達達個鼻仔, 已經完全好番晒喇, 咁就集中對付寒流, 希望3隻豬平安渡過; 物理治療密D做, 氣管又特別照顧週到! 但平淡嘅日子都唔易過, 總係有小風波!
一連多日豆b對開餐反應唔大, 對一隻為食豬仔呢個轉變係好有問題, 我第一時間諗係佢嘅牙仔, 可能牙齦發炎整痛咗口仔喇; 即刻餵佢順勢療劑, 但餵咗幾日都改進唔大, 我張開佢口檢查又唔見潰爛, 係D門牙鬆咗囉!
但呢個唔係最近嘅事啦, 無咁大影響嘛, 幫佢探熱溫度正常, 大小便同平時一樣, 無氣促無鼻鼾聲, 呼吸瞓覺姿勢又無異樣喎; 見佢對開餐唔雀躍, 就用手去餵, 佢吞嚥係正常, 又唔似有關個喉嚨仔問題!
開始懷疑佢有情緒病, 試吓唔再用手餵, 但佢唔係好想食咁行返開嚟, 我只用手拎起個糧兜, 遞去佢面前, 佢就食得好快, 咁係點解?
再三觀察, 發覺佢除咗食正餐, 連飲湯都係一樣, 飲湯無關牙仔啦, 一樣係拎起個兜佢會快快飲晒, 又唔似吞嚥困難!
又有懷疑佢頸痛唔可以嗒低頭仔, 但佢頭仔轉動同行走又無問題, 仲有係零食時間可以飛咁快走過嚟!
唔通一向表現得無所謂嘅豆b都開始情緒有問題? 開始爭寵?
要再觀察吓豆b身體有無異狀, 年紀越嚟越大, 機能只會越嚟越差, 要照顧多D都預咗喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
