擇日行動 (w/album ,video)

相片連結

琴日又做大project, 快快手同3隻豬仔沖涼!
睇過天文台天氣報導, 過年前嘅天氣都頗反覆, 暖一兩日又會凍返, 見琴日天氣真係幾好, 係過年前最暖嘅一日, 就即刻行動!

講起嚟好似有D誇張, 沖個涼都要擇日, 不過呢D唔係迷信, 只係唔想令自己更辛苦; 萬一為咗沖涼冷病, 咁就真係自尋死路!
唔係未遇過大時大節搵醫生, 睇開嘅診所唔開, 又唔敢胡亂去睇新嘅醫生, 真係好徬徨; 希望盡可能樣樣做足, 可以免除煩腦!
雖然係回暖, 但何妨做到足, 浴室內我都加咗暖爐!


琴日集中係沖涼無修毛, 剪毛可以慢慢做, 3隻豬琴日好乖好合作, 就連豆B都無爬高; 好順利同3隻豬快快做好, 今次善後清潔有工人姐姐做, 我就唔覺辛苦喇!

工人姐姐已經嚟咗半個月喇, 比我感覺好好, 可能係自己調整過心態, 好多嘢都唔在乎; 姐姐都有打爛咗我個電子燉盅, 雖然都會覺得失望, 點解唔可以小心D做得更好?

不過佢勝在態度良好, 而且算係勤力, 到目前為止都有好好嘅學習態度; 起碼吸塵會關顧到隱蔽嘅地方, 唔似上一位好似寫大字咁馬虎!
不過現在仍處於蜜月期, 開頭所有工人姐姐都係幾好嘅, 日子耐咗就會學識懶惰, 花樣層出不窮!

針係無兩頭利啦, 目前我一切都要跟到足, 半個月落黎伙頭將軍都係我做, 到有朝一日可以放手, 應該都係佢學壞嘅時候喇!
都費事往後諗, 得優悠時且優悠, 得開心時且開心啦!


多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！