 |
| 相片連結 |
今日真係凍, 又聽到外面好大風, 仲勁過有颱風, 好恐怖!
原來話今個冬天係59年來香港最凍嘅冬季，唔怪得啦！
拎個手機望下天文台紀錄, 見到3.7度, 不過FB有網友貼圖, 佢住嗰度係2.4度, 最誇張有人話荃灣今朝得壹度咋, 當然未計郊外高山, 肯定仲凍啦, 市區都已經係好凍好凍!!
不過為咗3隻豬, 我一定調較好室內溫度同濕度, 保持住溫度喺21-23度之間, 而濕度就50-60%!
要保住佢哋嘅肌肉關節唔僵硬唔痛痛, 仲有我最怕佢哋嘅敏感氣管, 要確保佢哋呼吸暢順!
我加咗cough drops, 放落個放濕機度, 等細霧帶出淡淡嘅味度, 我吸咗都覺舒服; 又準備咗個暖壺, 定時將熱水加落healthy mouth水度, 等佢哋有溫水飲用, 仲有物理治療當然會多做!
做得嘅都盡量做, 希望安全捱過呢個寒冬, 唔好病到; 3隻豬係我嘅心頭肉, 為咗佢哋我願意多D付出!
琴日已經好凍, 所以餵多餐羊奶麥片, 等佢哋有多D熱量補充, 今日都會一樣, 等佢哋做隻溫暖寶寶!
天氣都仲有排凍, 3隻豬只可以留喺屋企度, 還好3隻豬都可以作伴, 呢排亦算好乖, 無咩打交 :)
只係達達公主好刁蠻, 係都要上梳化坐啊; 都係老公縱壞, 每日放工都同佢排排坐睇電視, 佢習慣咗高人一等喇; 唔順佢所願佢就不停吖吖叫, 嘈到你煩晒!
我真係無勇氣離開室內行出街, 由得3隻豬仔冬眠啦; 波波達達上大床已經好滿足, 豆b就自己瞓床仔喇, 不過我將個電暖墊放咗落佢嘅床仔下面, 再舖上暖氈, 用手摸過暖笠笠, 好舒服啊!
阿女近來突然有興趣種盆栽, 仲好主動為3隻豬種小麥草, 不過佢話從來未試過, 就種少量試吓; 收成雖然無Mi以前送比我嘅粗壯, 但總算成功, 粗壯與否可能有關種子嘅級數; 佢已經準備好有機泥土, 而Mi又話送比我佢從美國訂返嚟嘅一級有機種子, 3隻豬以後有靚靚小麥草補充, 真幸福!
工人姐姐轉眼已經做咗一個禮拜, 已經見到有進步, 慶幸佢學習態度唔散漫, 一切會跟我指示去做, 希望往後更好啦!
天氣咁凍我知佢極唔習慣, 都喺佢房間放咗暖爐, 仲有羊毛厚被羊毛氈, 珊瑚絨等, 比佢保暖希望佢瞓得好!
 |
| 到目前仍工作認真, 感恩! |
今日佢放假, 我再三叮囑唔好逗留室外咁耐, 亦送咗新嘅羊毛頸巾手套, 仲有羽絨同抵冷衫, 身心嘅溫暖希望佢感受到!
從來對工人都唔差, 只係唔明佢哋乜嘢心態, 總係學壞; 呢個姐姐比我感覺唔壞, 係從佢嘗試同3隻豬表示友好, 唔似虛假態度, 希望我無跌眼鏡啦!
雖然話工人放假天, 僱主唔需要供給早餐, 但你好我就無所謂喇, 而且天氣咁凍, 食飽出去會暖D嘛!
好希望呢個姐姐會越做越好, 更希望唔好學壞, 請工人從來無運嘅我, 希望今次會苦盡甘來啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
