點解突然舊事從提, 全因睇到幾篇同醫生有關嘅po文!
(不過, 當我睇完作出交流後, 幾處有關嘅po文已被刪除)
一開始係有寵物主人投訴醫生見死不救, 話見自己毛孩病發, 眼見情況嚴重, 就往診所衝; 當時未到正式開診時間, 只見清潔女工, 事主要求見醫生不果, 毛孩又已休克, 急極大喊, 自己試做人工呼吸心按壓; 及後得知醫生原來已喺診所內, 但未到開診時間唔接受急診!
呢個純係睇事主描述, 事發真相我無權評論, 但見有其他摟主話毛孩主人於理不合, 未到開診時間自己衝入, 仲無理取鬧罵醫生, 咁急應該到24小時嘅急診!
我自己會覺得, 主人住處應該同呢間診所就近罷, 可能擔心再耽擱時間毛孩會失救, 所以先希望節省時間, 救到嘅機會仲有可能; 我理解當毛孩發病而情況失控會驚到茅晒, 個腦亂到無分析能力, 所以即使主人亂衝, 我同情瞭解, 針唔到肉我都體會到嗰種痛!
不過真相無人知, 各執一詞亦無意義!
跟住另有樓主發言炮轟, 話醫生無做好本份, 應診中投訴貓毛令佢鼻敏感, 主人概嘆做得獸醫應該預咗毛孩係有甩毛嘅可能, 點解唔戴上口罩先應診?
樓主投訴醫生唔專心, 診症中同護士嘻嘻哈哈令佢失信心!
(呢點我認同, 每次都見一路針灸一路閒話家常, 研究邊間餐廳食甜品....等等, 如果醫生專心又點會拔漏針?)
最最促使我出呢篇貼文, 竟然同促使我去睇呢個醫生係同一個人!
竟然見到有一篇回應, po文者就係曾出過blog文講述呢個醫生, 當日我就係睇咗佢嘅文章, 綜合晒各種原因, 我先決定去見呢個醫生!
琴日佢概歎唔會再推介朋友去睇呢個醫生, 話說佢狗狗喺呢間診所針灸, 每星期一次有一個頗長嘅時間, 算係熟客仔喇, 某日狗狗突然中風, 佢急帶狗狗到太平道睇咗呂醫生, 診斷後確定係無得救, 應該48小時內會走!
樓主極傷心, 但仍希望從無可能中去搵可能, 反正西方醫學無能為力嘅, 都希望試吓針灸; 佢急電醫生, 請佢為毛孩做一次針灸, 雖然係並無預約, 但求醫生例外接受, 算係毛孩最後一個請求!
電話嘅另一頭傳來冰冷回音, 對唔住7點一定要走, 任佢苦苦哀求, 呢個case醫生點都唔肯接收 !
樓主概嘆一個好醫生, 除咗醫術高明, 係咪應該具備一點愛心?
原來樓主係朋友嘅朋友, 所以FB上常見樓主嘅留言, 相信佢唔係屈得就屈嘅人!
當佢知道我係因為睇咗佢嘅blog去見呢個醫生,後悔狗狗走咗後無將個blog更生, 琴日已即時刪文; 而我亦錯誤於達達出事後, 無將診所嘅資料刪走, 亦無交代過達達停止針灸嘅原因; 不過一切討論嘅都只係針對醫生本人, 事實公道咁講句, 佢嘅針灸技術其實都係曾經幫過好多人!
我亦已經全面將呢間診所一切資料刪除, 只用不開名形式去引叙, 達達嘅事件無做成大傷害係我幸運, 我只係概歎咁不近人情嘅做法, 令我要從新厘定, 今時今日仲有無所謂嘅"醫者父母心?"
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
