除夕達達意外事件告一段落, 達達好好彩無大損傷; 祈盼3隻豬今年及來年都會平平安安!
都唔知發生乜事, 踏入2016年就聽到週邊朋友嘅狗狗陸逐出事, 近兩日仲聽到唔止一個求救電話, 話事發突然搵唔到獸醫, 問我有無辦法幫忙!
我當然希望我有能力幫忙, 無奈我3隻豬次次有突發事, 我一樣咁徬徨, 都係搵唔到獸醫, 只可以慨嘆寶貝有急症全睇天意!
有朋友狗狗無食慾無力, 睇醫生食藥完成兩星期療程, 未到覆診日期突然休克, 拍打佢都無晒反應, 即刻急送醫院希望盡快治療得以保命!
還幸醫院肯接呢個case, 可能朋友熟識賣到人情; 不過狗狗需要即時輸血, 懷疑免疫系統出事, 我祈求快D搵出原因, 狗狗得以控制病情啦!
有網友狗狗又突然後脚無力, 頭唔可以耷低, 行走如醉漢搖擺不定; 當佢同我講及狗狗呢個病情, 我第一個想法係椎間盤突出壓住神經, 我叫佢盡快帶狗狗求診, 呢個係急症; 可惜佢睇開嘅醫生休假, 又好多唔接新症!
還好最後我推介Dr Fan接咗呢個症, 但斷症係髖關節出事, 脊骨長期受壓力, 過度勞損, 治本方法只有手術矯正!
朋友狗狗係超小型,實在唔敢做10小時大手術, 仲要左右腳做兩次!
徬徨心痛, 思緒紊亂又無助, 我明白個中感受十分同情!
又有朋友突傳訊息叫救命, 嚇得我手震心驚, 即時致電問詳情, 原來狗狗確診腸塞, 又搵唔到醫生救命; 我都只有向Dr Fan求救, 但可惜今次無位賣唔到人情; 明知事出突然dr. Hsiang都唔會有空位接症, 最後狗狗都係等等等....希望聽日可以攝到位, 做到手術保命!
又有網友狗狗肺炎, 入院治療後, 出院完成抗生素兩週, 但都未治好個炎症, 又要繼續抗生素療程!
又有狗狗需要霧化機資料, 有氣管問題, 想清楚順勢療劑嘅詳情!
一連串都係我週邊嘅朋友, 知道咁多壞消息真係無晒心情, 無奈我呢D小人物都幫唔到手, 只可以盡量解答所知嘅部份情形!
呢兩日此起彼落嘅都係唔開心嘅聲音, 安慰解答令我精神疲乏, 還望上天憐憫, 願所有狗狗病情好轉, 唔好叫媽媽擔心!
講真, 睇到聽到太多有關獸醫嘅負面消息, 我對動物醫院嘅睇法好灰色 :'(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
